Dowladda Turkiga ayaa si rasmi ah uga qayb qaadaneysa weerarada xagga cirka ah ee ka socda Gobolka Shabellaha Dhexe, iyagoo taageero u fidinaya howlgalka ay Ciidanka Xoogga Dalka iyo kuwada Difaaca Shacabka kula dagaalamayaan maleeshiyada Al Shabaab.
Turkiga ayaa uga falcelinaya codsi rasmi ah oo dhawaan uga yimid Madaxda Qaranka, kuwaasoo dalbaday in la xoojiyo duqeymaha ka dhanka ah Al Shabaab inta ay socdaan howlgalada dib-u-xoreynta Hirshabelle iyo Galmudug. Waxaana diiradda la saarayaa in diyaaradahooda dagaalka ay si gaar ah uga howlgalaan Shabellaha Dhexe, oo culeys aan horay loo arag kala kulmay weerarada ay Shabaabku qaadeen toddobaadyadii la soo dhaafay.
Turkiga oo Bayraktar TB2 u adeegsanaya duqeymaha
Saraakiisha Turkiga ee ka howlgala gudaha Soomaaliya ayaa maalmihii la soo dhaafay si joogto ah uga fulinayay duqeymo gobolkaasi, iyagoo adeegsanaya diyaaradaha aan duuliyaha lahayn ee Bayraktar TB2.
Ilo xog ogaal ah ayaa sheegaya in saraakiisha ka tirsan Saldhigga Turksom, oo ku yaalla duleedka Muqdisho, ay si toos ah u duqeynayaan bartilmaameedyada ay codsadaan Militariga Soomaaliya.
Dhanka kale, Saraakiisha Ciidanka Kumaandooska Gorgor, oo Turkiga uu tababaray, ayaa si dhow ula shaqeynaya Taliska Turksom, iyagoo gacan ka siinaya bartilmaameedyada la beegsanayo.
Duqeymihii ugu xooganaa oo lala beegsaday Al Shabaab
Muddo 8 cisho gudahood, duqeymaha laga fuliyay Gobolka Shabellaha Dhexe ayaa noqday kuwa ugu culus ee Al Shabaab lagula beegsaday gobolkaasi muddo kooban gudaheed.
Wararka ayaa sheegaya in duqeymaha ay si wadajir ah u fuliyeen Nabad Sugidda & Sirdoonka Qaranka (NISA) iyo Militariga Soomaaliya, iyagoo adeegsanaya diyaaradaha dagaalka ee Turkiga.
Horaantii bishan ayaa la soo wariyay in NISA ay gacanta ku heyso drones-yada yaryar ee is-qarxiya, kuwaas oo dhowaan lagu beegsaday bartilmaameedyo ku yaalla Degmada Ceelbaraf.
Dowladda Turkiga oo ka duwan Mareykanka
Turkida ayaa si gaar ah uga duwan Mareykanka marka ay timaado howlgallada noocan oo kale ah, maadaama aanay sida caadiga ah shaacin bartilmaameedyada ay duqeeyaan Koofurta & Bartamaha Soomaaliya.
Dowladda Ankara ayaa mar kasta garab taagan Soomaaliya, waxaana ay taageerada militari, dhaqaale iyo amni siineysay dowladda federaalka muddo ka badan toban sano.
Xiriirka Dowladda Ankara & Soomaaliya oo sii xoogeysanaya
Dowladaha Soomaaliya iyo Turkiga ayaa 8-dii Febraayo 2024 kala saxiixday heshiis iskaashi oo 10 sano ah, kaas oo ku saabsan dhinacyada difaaca iyo dhaqaalaha.
Dowladda Turkiga ayaa ah saaxiibka ugu weyn ee ay Soomaaliya maanta leedahay, wuxuuna Muqdisho ka taageeraa:
🔹 Dib-u-dhiska Ciidamada Qalabka Sida iyo qalabeyntooda.
🔹 Xoojinta amniga iyo dowladnimada.
🔹 Hormarinta kaabeyaasha dhaqaalaha.
📌 Wararka24 – Xog rasmi ah & Faahfaahin degdeg ah
