Wararka24: 4-02-2026 Xildhibaannada labada Aqal ee Baarlamaanka Federaalka Soomaaliya ayaa lagu wadaa inay yeeshaan kulan xasaasi ah oo ka dhacaya xarunta Villa Hargeysa, kaas oo looga doodayo laguna meel-marinayo wax ka beddelka cutubyada muhiimka ah ee Dastuurka KMG ah.
Guddoonka sare ee Baarlamaanka ayaa farriin u diray xubnaha labada Gole si ay uga soo qeybgalaan fadhiga, iyadoo ajendaha ugu weyn uu yahay ansixinta cutubyada 4-aad ilaa 13-aad ee dastuurka. Qodobbadan ayaa horey uga soo gudbay marxaladihii doodda iyo dib u eegista ee ay sameeyeen mudanayaasha.
Si loo ansixiyo wax ka beddelka dastuurka, waxaa loo baahan yahay aqlabiyad gaar ah oo ka kooban saddex meelood laba meel xubnaha labada Aqal. Golaha Shacabka oo ka kooban 275 xildhibaan ayaa looga baahan yahay ugu yaraan 184 mudane inay fadhiga soo xaadiraan si ay u buuxiyaan shuruudda aqlabiyadda.
Dhanka Aqalka Sare oo tiradiisu tahay 54 senator, waxaa loo baahan yahay ugu yaraan 36 xubnood inay kasoo qeybgalaan fadhiga si loo helo tirada sharcigu qabo. Marka la isku daro labada Aqal, guud ahaan waxaa la doonayaa in ku dhawaad 220 mudane ay joogaan si codeyntu u noqoto mid sharci ah.
Dhanka kale, ammaanka magaalada Muqdisho ayaa si weyn loo adkeeyay, iyadoo ciidamo dheeraad ah la dhigay hareeraha xarunta Baarlamaanka iyo waddooyinka muhiimka ah ee caasimadda.
Kulankan ayaa kusoo aadaya xilli ay taagan tahay dood xooggan oo ku saabsan wax ka beddelka dastuurka, iyadoo qaar ka mid ah xildhibaannada mucaaradka, gaar ahaan kuwa ka soo jeeda Jubbaland iyo Puntland, ay si cad uga hor yimaadeen qorshaha wax ka beddelka dastuurka.
