Wararka24: 9-02-2026 Wararka ka imanaya xuduudda u dhaxaysa Israa’iil iyo Lubnaan ayaa sheegaya in dagaallo culus ay ka dhaceen waqooyiga Israa’iil kadib weerarro ay qaadeen dagaalyahannada Xisbullah.
Warbaahinta Lubnaan iyo ilo la xiriira Xisbullah ayaa sheegay in dagaalyahannadoodu ay weerareen ciidamada Israa’iil ee ku sugan xadka, iyadoo la sheegay in ciidamada Israa’iil ay isku dayeen inay jawaab ka bixiyaan iyagoo adeegsanaya helikobtarro dagaal.
Sidoo kale warar aan si madax-bannaan loo xaqiijin ayaa sheegaya in helikobtar Israa’iili ah lagu soo riday deegaanka Dooxada Beqaa ee Lubnaan intii uu socday iska horimaadka.
Dhanka Israa’iil, sirenno digniin ah ayaa laga maqlay qaybo ka mid ah waqooyiga dalka, halka dadka deegaanka qaarkood ay baraha bulshada ku muujinayaan walaac ku saabsan xaaladda amniga.
Illaa hadda ma jirto war rasmi ah oo ka soo baxay militariga Israa’iil oo xaqiijinaya khasaaraha la sheegay, iyadoo xaaladda xuduudda Israa’iil iyo Lubnaan ay weli kacsan tahay.
