Ciidanka Booliska Somaliland ayaa gacanta kusoo dhigay Yaxye Maxamed Abees, oo loo haysto dil shalay ka dhacay xaafadda Maxamed Mooge ee magaalada Hargeysa.
Sida lagu sheegay war rasmi ah oo lagu daabacay barta Facebook ee Booliska, eedeysanaha ayaa la qabtay kadib dadaal dheer, waxaana lagu soo dhoweeyay kantaroolka galbeed ee magaalada, halkaas oo lagu xiray.
Faahfaahinta Dilka manta hargeysa Somaliland
Ninkan ayaa lagu eedeeyay inuu fiidnimadii Khamiista dilay Marxuum Guuleed Maxamed Yuusuf, hase yeeshee, boolisku ma shaacin sababta keentay falka iyo nooca hubka loo adeegsaday.
Saraakiisha amniga ayaa sheegay in eedeysanaha la horgeyn doono hay’adaha garsoorka si sharciga loo marsiiyo.
Dilkii labaad ee ka dhacay xaafadda Maxamed Mooge
Dilkan ayaa noqonaya kii labaad ee muddo kooban gudahood ka dhaca xaafadda Maxamed Mooge, kadib markii dhowaan halkaas lagu dilay taliyihii saldhigga booliiska ee degmada. Gacan ku dhiiglihii falkaas hore ayaa la qisaasay.
Hargeysa, oo ah caasimadda Somaliland, ayaa horey loogu yaqaanay nabadgelyo, hase yeeshee, falalka dilalka ah ayaa sare u kacay bilihii u dambeeyay, taasoo walaac ku abuurtay shacabka.
📌 Wararka24 – Xog rasmi ah & Faahfaahin degdeg ah
