Wararka24: 15-02-2026; Dowladda Maraykanka ayaa ku dhawaaqday in ciidamada hay’adda Socdaalka iyo Kastamka Maraykanka (ICE) ay ka baxayaan magaalada Minneapolis, taasoo lagu tilmaamay go’aan istiraatiiji ah oo lagu doonayo in diiradda loo saaro fulinta sharciyada socdaalka gudaha United States.
Wakiilka Xuduudaha, Tom Homan, ayaa sheegay in inkastoo howlgallo muhiim ah laga fuliyay Minneapolis, ay hadda tahay waqtigii ay ICE u gudbi lahayd gobollada kale si ay diiradda u saarto maamulka iyo fulinta sharciyada socdaalka ee guud ahaan dalka.
ICE ayaa horraantii Diseembar 2025 ka bilaabay magaalada Minneapolis howlgal lagu magacaabo Operation Metro Surge, taasoo lagu beegsanayay dadka loo haysto dembiyo ay ka mid yihiin xatooyo maaliyadeed iyo falal kale oo sharci darro ah.
Intii hawlgalku socday, dhowr qof oo Soomaali ah kuwa sharci haysta iyo qaar sharci la’aan ah ayaa lagu qabtay howlgalladaas. Sidoo kale waxaa jiray dhacdooyin foolxumo oo keentay khasaare naf iyo dhaawac intii ay socdeen mudaharaadyada ka soo horjeeday hawlgallada.
Agaasimaha ku-meel-gaarka ah ee ICE Todd Lyons ayaa sheegay in hay’addu ay howlgallo ka bilaabi doonto Koonfurta California, halkaas oo uu tilmaamay in ay ku badan yihiin ajaanib sharci darro ah, iyadoo ay qorshuhu tahay in la xoojiyo fulinta sharciga si waafaqsan siyaasadaha socdaalka ee dalka Mareykanka.
Markii warkan la daabacay, saraakiil ka tirsan ICE ayaa lagu arkay magaaladaas, taasoo muujinaysa isbeddelka goobaha ay howlgalladu ka socdaan.
