Wararka24: Dowladda Federaalka Soomaaliya ayaa sii waddo howlgalka hub ka dhigista ee lagu beegsanayo xaafadaha ay joogaan ciidanka mucaaradka, iyadoo laamaha amniga ay sheegeen in ujeedada ugu weyn ay tahay xakameynta hubka sharci darrada ah iyo adkeynta amniga caasimadda. Howlgalladan ayaa kusoo aadaya xilli ay jireen xiisado siyaasadeed iyo iska hor imaadyo dhacay toddobaadyadii la soo dhaafay.
Taliyaha Qaybta Guud ee Booliska Gobolka Banaadir, Macallin Mahdi, ayaa sheegay in howlgalka weli socdo, isla markaana ciidamada amniga ay diiradda saarayaan uruurinta hubka aan sharciga waafaqsanayn. Wuxuu shacabka ugu baaqay inay la shaqeeyaan hay’adaha amniga si loo xaqiijiyo amniga guud ee magaalada.
Macallin Mahdi ayaa sidoo kale ku boorriyay muwaadiniinta inay la wadaagaan laamaha amniga xog kasta oo la xiriirta hub sharci darro ah. Sida uu sheegay, wada shaqeynta shacabka iyo ciidamada ayaa muhiim u ah guusha howlgalka iyo sugidda xasilloonida Muqdisho.
Wararka la helayo ayaa tilmaamaya in howlgalka lagu ballaariyay degmooyin iyo deegaano horleh oo ka tirsan Gobolka Banaadir iyo duleedkiisa. Dhaqdhaqaaqyo ciidan ayaa sidoo kale laga dareemay deegaanno ku dhow Jaziira, halkaas oo ciidamada amniga ay ka wadaan baaritaanno iyo howlgallo lagu xaqiijinayo amniga.
Toddobaadyadii la soo dhaafay, ciidamada dowladda ayaa howlgallo ka sameeyay degmooyinka Howlwadaag, Cabdicasiis iyo meelo kale oo ka tirsan Muqdisho. Howlgalladaas ayaa lagu sheegay kuwo lagu baadi goobayay hub iyo kooxo la tuhunsan yahay inay ku lug leeyihiin abaabul ciidan oo aan fasax haysan.
Dhanka kale, xaaladda guud ee Muqdisho ayaa la sheegay inay tahay mid deggan, iyadoo ay socdaan dadaallo siyaasadeed oo lagu doonayo in lagu yareeyo xiisadaha u dhexeeya dowladda iyo mucaaradka. Ilo siyaasadeed ayaa sheegaya in kulamo iyo wada-hadallo ay socdaan, kuwaas oo ay taageerayaan dhinacyo caalami ah, si xal looga gaaro khilaafaadka ka dhashay arrimaha doorashooyinka iyo wax ka beddelka dastuurka kumeel gaarka ah.
