Wararka24: Wasaaradda Qoyska iyo Hormarinta Xuquuqul Insaanka Soomaaliya ayaa magaalada New York ku qabatay kulan ballaaran oo diiradda lagu saaray horumarinta haweenka Soomaaliyeed, iyadoo ay ka qeyb galeen wakiillo ka socda dowlado iyo hay’ado caalami ah.
Kulanka waxaa si wadajir ah u shir guddoomiyey Agaasimaha Guud ee Wasaaradda Mudane Maxamed Bashiir Cumar Ibraahim iyo ku xigeenka safiirka Dowladda Sweden u fadhiya Qaramada Midoobay Amb Andreas Von Uexkull, kuwaas oo hoggaaminayey doodaha ku saabsan xoojinta doorka haweenka.
Shirka oo ka dhacay New York ayaa lagu casuumay dhinacyo kala duwan oo ka shaqeeya arrimaha haweenka, waxaana uu barbar socday shir sanadeedka haweenka adduunka ee halkaas ka socday. Soomaaliya ayaa madasha ku soo bandhigtay xaaladda haweenka iyo caqabadaha ay wajahaan.
Agaasimaha Guud Maxamed Bashiir Cumar ayaa khudbad uu ka jeediyey furitaanka shirka ku faahfaahiyey tallaabooyinka ay dowladda Federaalka Soomaaliya qaadday, oo ay ku jiraan ansixinta sharciyo iyo siyaasado lagu xoojinayo ilaalinta iyo horumarinta haweenka, isagoo sidoo kale uga mahadceliyey taageerada caalamiga ah.
Ka qeybgalayaasha shirka ayaa bogaadiyey dadaallada Soomaaliya ay ku horumarinayso haweenka, iyagoo muujiyey taageero dheeraad ah oo lagu xoojinayo barnaamijyada iyo siyaasadaha la xiriira arrintan.
Kulankan ayaa qeyb ka ah dadaallada joogtada ah ee Wasaaradda Qoyska iyo Hormarinta Xuquuqul Insaanka Soomaaliya ay ku dooneyso in ay ku horumariso xaaladda haweenka Soomaaliyeed.
