Wararka24: Ciidanka Ilaalada Qaranka ee dalka Kuwait ayaa soo riday diyaarad dagaal oo Mareykanka leeyahay, nooca F-15E, xilli ay ka hortagayeen weerarro gantaallo ah oo la sheegay inay Iiraan ka yimaadeen saacadihii u dambeeyay.
Wararka ayaa sidoo kale sheegaya in tani aysan ahayn markii ugu horreysay ee dhacdo noocan ah ay dhacdo, iyadoo marar hore loo arkay “xabbad saaxiibtinimo” oo keentay in diyaarado Mareykan ah si khalad ah loo soo rido.
Dhanka kale, ciidamada Kuwait ayaa ku dhawaaqay inay 24-kii saac ee la soo dhaafay soo rideen toddobo diyaaradood oo aan duuliye lahayn (drones), kuwaas oo ku soo xadgudbay hawada dalka.
Guud ahaan, tan iyo markii weerarradu billowdeen, waxaa la sheegay in la burburiyay 27 drone oo isugu jira kuwo waaweyn iyo kuwo yaryar.
Afhayeenka Ciidanka Ilaalada Qaranka ayaa sheegay in sidoo kale la baaray haraadiga gantaallo laga helay goobo kala duwan, isla markaana ciidamada la geeyay meelo muhiim ah oo istiraatiiji ah si loo adkeeyo amniga.
Wuxuu ugu baaqay shacabka inay ka fogaadaan wararka aan la hubin, isagoo xaqiijiyay in xaaladda guud ee dalka ay weli xasilloon tahay.
