Wararka24: Taliyaha Qaybta Guud ee Booliska Gobolka Banaadir, Gaashaanle Sare Mahdi Cumar Muumin, ayaa digniin u diray siyaasiyiinta mucaaradka ee ka hadlay suurtagalnimada qalalaase haddii doorashada dib uga dhacdo 15-ka May.
Taliyaha ayaa sheegay in hay’adaha ammaanku aysan oggolaan doonin in ammaanka caasimadda Muqdisho la siyaasadeeyo, isaga oo caddeeyay in cid kasta oo isku dayda inay wax u dhimto amniga si adag loola tacaali doono.
“Ammaanku maaha siyaasad, ammaanku waa nolosha muwaadinka. Qof kasta oo isku daya inuu wax u dhimo amniga gacan adag ayaa lagu qabanayaa,” ayuu yiri Taliye Mahdi Cumar Muumin.
Hadalkan ayaa imanaya xilli ay sii kordhayaan hadallada siyaasadeed ee ku saabsan waqtiga doorashada iyo dastuurka cusub ee uu ansixiyay Baarlamaanka Federaalka Soomaaliya, kaas oo mucaaradku ay ku doodayaan inuu horseedi karo dib-u-dhac doorasho.
Arrintan ayaa kusoo beegmeysa iyadoo Soomaaliya ay wajahaysa muran siyaasadeed oo ku saabsan hannaanka doorashooyinka iyo wax ka beddelka dastuurka, xilli ay sidoo kale jiraan caqabado kale oo ay ka mid yihiin xaaladaha amniga iyo abaaraha dalka.
DAAWA MUQALKA
