Liverpool – Maalintii Khamiista, hay’adaha booliiska dalka Ingiriiska ayaa dacwado rasmi ah ku soo oogay nin da’diisu tahay 53 sano, kaas oo lagu eedeynayo toddoba dembi oo kala duwan. Eedeymahaasi waxay ka dhasheen weerar baabuur uu ku fuliyay dadkii u dabaal-degayay guusha kooxda Liverpool ee horyaalka Premier League.
Ninka la eedeynayo oo lagu magacaabo Paul Doyle ayaa wajahaya eedeymo culus oo ay ka mid yihiin darawalnimo khatar leh iyo geysta dhaawac ula kac ah. Dhacdadani waxay ka dhacday magaalada Liverpool ee waqooyi-galbeed England maalintii Isniinta.
Faahfaahinta Dhacdadan ka dhacday liverpool
Ku-xigeenka taliyaha booliiska degaanka Merseyside, Jenny Sims, ayaa shir jaraa’id ku xaqiijisay in Doyle uu xabsiga ku jiro, isla markaana uu maalinta Jimcaha ka soo muuqan doono maxkamadda degmada Liverpool.
“Waxaan haysannaa xog caddaynaysa in 79 qof oo da’doodu u dhaxaysay 9 sano ilaa 78 sano ay ku dhaawacmeen dhacdada. Baabuurka noociisu yahay Ford Galaxy ayaa dhex galay dadkii dabaal-degayay guusha Liverpool ee ku guuleysatay horyaalka 20-aad ee England,” ayay tidhi Sims.
Guushaasi waxay ahayd mid rikoor ah oo soo afjaraysa sugitaan muddo dheer ah. Nasiib wanaag, ma jirin wax dhimasho ah oo la sheegay in ay ka dhasheen weerarka.
Sims waxay intaa ku dartay in toddoba qof ay weli ku jiraan xaaladda caafimaad ee isbitaalka maalinta Khamiista. “Dadka dhaawaca ah waxaa laga helayaa kaalmo caafimaad oo buuxda, waxaana la rajeynayaa in ay si degdeg ah u soo kabban doonaan,” ayay ku dartay.
Sarah Hammond oo ka tirsan Xafiiska Dacwad-Oogista Qaranka ayaa caddeysay in hay’addu ay oggolaatay in dacwado rasmi ah lagu soo oogo Doyle.
“Dacwad-oogayaasha iyo booliisku waxay si degdeg ah uga shaqeynayaan dib-u-eegista caddeymo aad u fara badan. Tani waxa ay ka kooban tahay muuqaallo kala duwan iyo markhaatiyo tiro badan. Waa muhiim in dhibbane kasta uu helo caddaalad buuxda,” ayay sheegtay Hammond.
Doyle, oo kasoo jeeda xaafad ku taalla magaalada Liverpool, ayaa marka hore la xiray Isniintii. Eedaymaha kale ee marka hore lagu soo eedeeyay oo ay ka mid yihiin isku day dil iyo darawalnimo isagoo daroogaysan, ma ay ku jirin liiska rasmi ee dacwadaha hadda lagu soo oogay.
Hammond waxay ku nuux-nuuxsatay in “dhammaan eedeymaha dib loo eegi doono marka baaritaanku sii socdo.”
Warbixinnada ka soo baxaya warbaahinta dalka ayaa sheegaya in Doyle uu yahay ganacsade oo hore u ka tirsanaa ciidamada badda, isla markaana uu leeyahay saddex carruur ah oo weli dhallinyaro ah.
Sida ay Dhacdadu u Dhacday
Boqollaal kun oo taageerayaal ah ayaa isugu soo baxay bartamaha magaalada Liverpool si ay u dabaal-degaan guusha kooxdooda. Nasiib-darro, farxaddaasi waxay ku badashay argagax markii baabuurka uu si kedis ah ugu dhex dhacay dadka.
Muuqaallo lagu baahiyay baraha bulshada ayaa muujinaya baabuurka oo si xoog leh ugu dhex dhacay dadka, halka qaar ka mid ah dadka uu jiidayay, kuwa kalena ay ku dhaceen qeybta hore ee gaariga. Afar qof oo uu ku jiro ilmo yar ayaa ku xayirmay hoosta baabuurka, waxaana badbaadiyay kooxda dab-demiska markii ay kor u qaadeen gaariga.
Jawaabta Booliiska
Booliiska ayaa si degdeg ah u xaqiijiyay in dhacdadu aanay xiriir la lahayn argagixisanimo. Waxay kaloo caddeeyeen in ninkaasi uu yahay muwaadin caddaan ah oo u dhashay Britain – tallaabo ay qaadeen si ay u joojiyaan faafinta xogaha been-abuurka ah ee baraha bulshada.
Baaritaanka dhacdada ayaa weli socda, waxaana la filayaa in faahfaahin dheeraad ah ay soo bixi doonaan maalmaha soo socda.
