Wararka24: 28-01-2026:Qaramada Midoobay ayaa shaacisay Qorshaha Gargaarka Bani’aadannimo ee Soomaaliya ee sannadka 2026, kaas oo ku kacaya $852 milyan, islamarkaana lagu taageerayo 2.4 milyan oo qof oo ka mid ah dadka ugu nugul dalka.
Afhayeenka Qaramada Midoobay, Stéphane Dujarric, ayaa sheegay in miisaaniyadda qorshahan ay hoos u dhacday ku dhowaad 40% marka loo eego lacagtii la codsaday sannadkii hore, isagoo carrabka ku adkeeyay in hoos u dhacaasi uusan ka iman baahiyaha dadka oo yaraaday, balse uu salka ku hayo dhaqaale xumo iyo kheyraad kooban oo haysta hay’adaha gargaarka.
Dujarric ayaa sheegay in hoos u dhaca maalgelinta uu sababi doono in adeegyo badan oo muhiim ah la yareeyo, isla markaana in ka yar kala bar dadka u baahan gargaar ay heli doonaan caawimaad bani’aadannimo sannadkan.
Afhayeenka QM ayaa ka digay in haddii aan si degdeg ah loo helin maalgelin dheeraad ah, ay sii xumaan doonaan xaaladaha abaarta daba-dheeraatay, barakaca, cudurrada faafa, nolol-beelka iyo cunno-yarida, kuwaas oo durba saameyn xooggan ku leh qeybo badan oo dalka ah.
Wuxuu xusay in sannadkii hore Qaramada Midoobay ay Soomaaliya u codsatay gargaar dhan $1.4 bilyan, balse la helay oo keliya $397 milyan, taasoo u dhiganta 27%, arrintaas oo keentay in hay’adaha gargaarku ay yareeyaan ama gebi ahaanba joojiyaan adeegyo naf-badbaadin ah.
Qorshahan cusub ayaa kusoo beegmaya xilli xaaladda bani’aadannimo ee Soomaaliya ay weli tahay mid adag, iyadoo malaayiin qof ay wajahayaan cunto-yari, biyo la’aan iyo daryeel caafimaad oo xaddidan..
