Wararka24: Doorashada Guddoomiyaha Golaha Shacabka ee Baarlamaanka Federaalka Soomaaliya ayaa la filayaa inay berri ka dhacdo magaalada Muqdisho, iyadoo maanta la soo gabagabeeyay diyaar-garowga goobta iyo habraacyada loogu talagalay qabsoomidda doorashada.
Guddoomiyaha KMG ah ee Golaha Shacabka, Sacdiya Yaasiin Xaaji Samatar, ayaa maanta kormeertay goobta loo diyaariyay doorashada, iyadoo ay wehliyaan Guddoomiye Ku-xigeenka Labaad Cabdullaahi Cumar Abshirow, Guddiga Doorashada Guddoomiyaha Golaha Shacabka iyo Xoghayaha Guud ee Golaha, Cabdiraxmaan Maxamed Cabdulle (Jaabiri).
Mas’uuliyiintu waxay hubiyeen diyaar-garowga goobta, nidaamka cod-bixinta, habraacyada doorashada iyo agabka loo diyaariyay xildhibaannada. Sacdiya Yaasiin ayaa ku adkaysatay muhiimadda ay leedahay in doorashadu u dhacdo si hufan, caddaalad ah oo xasilloon, iyadoo la raacayo xeerarka iyo habraacyada Golaha Shacabka.
Doorashada Guddoomiyaha Golaha Shacabka ayaa waxaa ku tartamaya laba musharrax oo kala ah Cabdullaahi Maxamed Nuur iyo Cabdullaahi Cumar. Xildhibaannada Golaha Shacabka ayaa berri codkooda ka dhiiban doona doorashada lagu go’aaminayo qofka hoggaamin doona golaha.
Doorashadan ayaa ku soo beegmaysa xilli Soomaaliya ay wajahayo marxalad siyaasadeed oo muhiim ah, gaar ahaan arrimaha la xiriira doorashooyinka iyo jihada siyaasadeed ee dalka. Natiijada doorashada ayaa la filayaa inay saameyn ku yeelato hoggaanka iyo howlaha Golaha Shacabka muddada soo socota.
Mas’uuliyiinta Golaha Shacabka ayaa ugu baaqay dhammaan dhinacyada ay khusayso inay ilaaliyaan nidaamka iyo xasilloonida inta ay socoto doorashadu, si cod-bixintu ugu dhacdo jawi ammaan ah oo waafaqsan habraacyada baarlamaanka.
