Wararka24: Hoggaamiyaha Xuutiyiinta Yemen, Cabdulmalik Al-Xuuti, ayaa khudbad uu ka jeediyay telefishinka ku eedeeyay Mareykanka iyo Israa’iil inay yihiin kuwa ugu waaweyn ee hurinaya colaadaha iyo xasillooni darrada ka jirta caalamka. Wuxuu sidoo kale Sacuudi Carabiya ku eedeeyay inay u adeegto danaha Washington iyo Tel Aviv.
Al-Xuuti ayaa sheegay in Mareykanka, Israa’iil iyo xulafadoodu ay ka faa’iideystaan colaadaha iyo kheyraadka dalal kale, isagoo ku dooday in dagaallada ka socda Bariga Dhexe ay salka ku hayaan qorshayaal lagu ballaarinayo saameynta Israa’iil ee gobolka.
Wuxuu sidoo kale ku eedeeyay Mareykanka iyo Israa’iil inaysan ixtiraamin heshiisyada caalamiga ah iyo go’aannada Qaramada Midoobay, isla markaana ay mas’uul ka yihiin burburka iyo dhibaatooyinka ka jira dalal badan.
Hoggaamiyaha Xuutiyiinta ayaa sheegay in Sacuudi Carabiya ay la safan tahay Mareykanka, Israa’iil iyo Britain, isla markaana ay caqabad ku tahay in dalalka Muslimiintu yeeshaan mowqif mideysan oo ku aaddan arrinta Falastiin.
Al-Xuuti ayaa sidoo kale ku andacooday in dagaalka Sacuudi Carabiya ay ka waddo Yemen uu socday sannado badan, isagoo ku tilmaamay mid aan sharci ahayn.
Wuxuu sheegay in shacabka Falastiin ay si weyn u saameeyeen siyaasadaha Riyadh, isla markaana Sacuudigu uu hor istaagay dadaalladii lagu mideyn lahaa dalalka Muslimiinta si cadaadis iyo cunaqabateyn loogu saaro Israa’iil.
Hadalladan ayaa kusoo aadaya xilli ay sii kordhayaan xiisadaha u dhexeeya Xuutiyiinta iyo Sacuudi Carabiya, kadib maalmo ay labada dhinac isweydaarsanayeen weerarro iyo hadallo kulul.
