Wararka24: Warbixin ay daabacday wargeyska Financial Times ayaa sheegtay in bangiyo ku yaalla Sacuudiga ay dib u dhigeen ama celiyeen lacagihii loo diri jiray akoonno ku yaalla Imaaraadka Carabta, arrin dhalisay walaac ku saabsan in khilaafka siyaasadeed ee u dhexeeya labada dal uu saameyn ku yeeshay xiriirkooda ganacsi.
Sida lagu sheegay warbixinta, lacagaha laga dirayay bangiyada Sacuudiga kuna socday akoonnada shirkado iyo shaqsiyaad ku sugan Imaaraadka, gaar ahaan magaalada Dubai, ayaa la sheegay in la hakiyay ama dib loo celiyay tan iyo bishii May, iyadoo marar badan aan la bixin wax faahfaahin ah oo ku saabsan sababta.
Mid ka mid ah madaxda shirkad caafimaad oo xarunteedu tahay Dubai ayaa u sheegay Financial Times in dhowr lacagood oo uga imaanayay macmiil Sacuudi ah oo ay muddo dheer wada shaqeynayeen ay bangiyada Sacuudigu hakiyeen ama dib u celiyeen tan iyo bartamihii bishii May.
Dhanka kale, Bangiga Dhexe ee Sacuudiga ayaa beeniyay jiritaanka xayiraado si gaar ah loogu bartilmaameedsanayo Imaaraadka ama dal kale. Bangigu wuxuu sheegay inuusan jirin amar rasmi ah oo lagu xanibayo wareejinta lacagaha dalal gaar ah.
Warbixintu waxay xustay in arrintan ay kusoo aadeyso iyadoo xiriirka u dhexeeya Sacuudiga iyo Imaaraadka uu wajahayo kala aragti duwanaansho ku saabsan arrimo dhowr ah oo gobolka ah. Inkasta oo labada dal ay muddo dheer ahaayeen xulafo dhow, haddana waxaa soo baxay khilaafyo la xiriira siyaasadaha gobolka iyo loollanka dhaqaale.
Khubarada ayaa sheegaya in labada dal ay sidoo kale ku tartamayaan soo jiidashada maalgashiga iyo xarumaha ganacsiga ee gobolka. Sacuudiga ayaa sanadihii u dambeeyay dhiirrigelinayay shirkadaha caalamiga ah inay xarumahooda gobolka u raro gudaha boqortooyada, halkii ay ka ahaan lahaayeen Dubai.
Inkastoo aan weli la xaqiijin in tallaabooyinkan ay ka dhasheen go’aan siyaasadeed oo rasmi ah, warbixinta Financial Times ayaa muujisay in hakadka la sheegay ee lacagaha uu sare u qaaday walaaca ganacsatada iyo shirkadaha ka shaqeeya labada dal. Ilaa hadda, ma jiro wax caddeyn rasmi ah oo muujinaya in xiriirka bangiyada iyo ganacsiga ee Sacuudiga iyo Imaaraadka uu si buuxda u saameeyay khilaafka siyaasadeed.
