Wararka24: Ra’iisul Wasaaraha Xukuumadda Federaalka Soomaaliya, Xamza Cabdi Barre, ayaa sheegay in Soomaaliya ay si weyn uga soo kabatay dhibaatooyinkii ka dhashay burburkii dowladnimada iyo colaadihii sokeeye ee muddada dheer saameynta ku yeeshay dalka.
Ra’iisul Wasaaraha ayaa sheegay in Soomaaliya ay soo martay marxalado adag oo dhinacyada siyaasadda, amniga, dhaqaalaha iyo nolosha bulshada ah, balse ay haatan ku tallaabsaneyso waddo dib u dhis iyo xasillooni. Wuxuu xusay in horumarka laga gaaray dhinacyo kala duwan uu muujinayo isbeddelka ka socda dalka.
Xamza Cabdi Barre ayaa sidoo kale sheegay in dalalkii iyo hay’adihii caalamiga ahaa ee hore uga fogaaday Soomaaliya ay dib ugu soo laabanayaan, iyagoo muujinaya daneyn ku aaddan maalgashi iyo iskaashi dhaqaale.
Ra’iisul Wasaaraha ayaa sheegay in kalsoonida caalamka ee Soomaaliya ay sii kordheyso, taas oo uu ku sababeeyay dib u dhiska hay’adaha dowladda, dadaallada lagu xoojinayo amniga iyo horumarka laga sameeyay dowladnimada.
“Caalamkii naga tegay ayaa maanta dib noogu soo noqonaya isaga oo inoo baahan oo dalka maalgashanaya. Dalka horay ayuu u socdaa, meel walibana wuu ka soo kabtay, dibna uma noqon doonno, waxaana u gudbaynaa dhismo, nabad iyo xalal waara,” ayuu yiri Ra’iisul Wasaare Xamza Cabdi Barre.
Hadalka Ra’iisul Wasaaraha ayaa ku soo beegmaya xilli Dowladda Federaalka Soomaaliya ay waddo dadaallo lagu horumarinayo dhaqaalaha, lagu soo jiidanayo maalgashiga dibadda iyo xoojinta xiriirka ay la leedahay beesha caalamka, iyadoo mas’uuliyiinta dowladda ay marar badan sheegeen in dalka uu galay marxalad cusub oo dib u soo kabasho ah.
