Wararka24: Qaar ka mid ah dalalka Carabta ee Khaliijka ayaa si hoose ugu sheegay Mareykanka iyo dowladaha Yurub inaysan gebi ahaanba kasoo horjeedin bixinta kharash lagu xoojinayo amniga Marinka Hormuz, balse ay si cad uga soo horjeedaan in Iran hesho awood ay ku maamusho ama ku xakameyso marin-biyoodkaas muhiimka ah.
Sida ay ilo Mareykan ah iyo kuwo gobolka ka tirsan u sheegeen warbaahinta Middle East Eye, dalalka Khaliijka ayaa kala saaraya bixinta kharashka lagu sugayo badqabka maraakiibta iyo in Tehran loo oggolaado inay go’aamiso cidda mari karta ama ka gudbi karta Marinka Hormuz.
Wararkan ayaa kusoo beegmaya xilli xiisadda u dhexeysa Mareykanka iyo Iran ay sii xoogeysaneyso, iyadoo weerarro lagu qaaday maraakiib ganacsi oo marayay biyaha u dhow Cumaan. Arrintan ayaa sare u qaaday walaaca laga qabo hakad ku yimaada dhoofinta shidaalka iyo gaaska ee dalalka Khaliijka.
Sarkaal Mareykan ah ayaa sheegay in dalal ka tirsan Khaliijka aysan u arkin bixinta kharashka amniga mid culays dhaqaale ku ah, balse waxa ay mudnaanta siinayaan xasilloonida iyo ilaalinta xorriyadda isu-socodka maraakiibta. Sarkaal kale oo gobolka ka tirsan ayaa xusay in welwelkoodu yahay in Iran ay yeelato awood ay ku joojiso ama ku fasaxdo maraakiibta mar kasta oo ay doonto.
Dooddan ayaa kusoo aadaysa xilli Madaxweyne Donald Trump uu dib usoo nooleeyay fikradda ah in Mareykanka dhaqaale looga bixiyo ilaalinta Marinka Hormuz. Wuxuu markii hore soo jeediyay in boqolkiiba 20 laga qaado qiimaha badeecadaha mara marin-biyoodka, isaga oo sheegay in dalalka Khaliijka ay qeyb ka noqdaan kharashka amniga.
Si kastaba ha ahaatee, Trump ayaa markii dambe sheegay inuu ka tanaasulay qorshahaas, isagoo xusay in dalalka Khaliijku beddelkiisa ballanqaadeen heshiisyo ganacsi iyo maalgashi oo waaweyn oo ay la geli doonaan Mareykanka. Wuxuu ku adkeystay in Mareykanku uusan kaligiis qaadi karin kharashka ilaalinta marin-biyood ay si weyn uga faa’iideystaan dalal badan iyo shirkadaha caalamiga ah.
Marinka Hormuz ayaa isku xira Khaliijka iyo Badda Carabta, waxaana mara qiyaastii shan meelood shidaalka iyo gaaska dabiiciga ah ee dunida lagu kala iibsado. Khubarada ayaa ka digaya in hakad kasta oo ku yimaada isu-socodka maraakiibta uu si degdeg ah u saameyn karo suuqyada tamarta iyo dhaqaalaha caalamka, iyadoo sharciga caalamiga ah ee baduhuna uu dammaanad qaadayo xorriyadda maraakiibta ee marin-biyoodkan.
