Wararka24: Wasaaradda Awqaafta iyo Arrimaha Islaamka ee Dowladda Federaalka Soomaaliya ayaa sagootisay laba arday oo dalka ku matalaya Tartanka Caalamiga ah ee Qur’aanka Kariimka, kaas oo lagu qabanayo Boqortooyada Sacuudiga.
Xafladda sagootinta ayaa waxaa ka qeyb galay Agaasimaha Guud ee Wasaaradda, Cabdinaafac Axmed Cabdullaahi, kaas oo tartamayaasha kula dardaarmay inay si sharaf leh u matalaan Soomaaliya, isla markaana muujiyaan akhlaaqda iyo qiyamka Qur’aanka Kariimka inta uu tartanku socdo.
Labada tartame ayaa kala ah Maxamed Nuur Maxamed Ibraahim, oo ka qeybgalaya tartanka xifdinta 30-ka juz ee Qur’aanka Kariimka, iyo Muna Cabdiraxmaan Maxamed Sabriye, oo ku tartamaysa xifdinta 15-ka juz.
Wasaaraddu waxay sheegtay in labada arday ay u soo baxeen tartanka caalamiga ah kadib markii ay kaalmaha ugu sarreeya ka galeen tartankii qaran ee Qur’aanka Kariimka ee ay Wasaaradda Awqaaftu qabatay bishii Ramadaan.
Mas’uuliyiinta Wasaaradda ayaa sheegay in ka qeybgalka Soomaaliya ee tartankan uu qeyb ka yahay dadaallada lagu horumarinayo barashada Qur’aanka Kariimka, tayeynta macallimiinta iyo dhiirrigelinta dhalinyarada ku xeel dheer xifdinta iyo tajwiidka.
Sanadihii u dambeeyay, tartamayaasha Soomaaliyeed ayaa ka qeybgalay tartamo Qur’aan oo heer gobol iyo caalami ah, iyagoo helay kaalmooyin iyo guulo kala duwan. Wasaaraddu waxay sheegtay in ka qeybgalka tartamadaasi uu gacan ka geysanayo kor u qaadista sumcadda Soomaaliya ee dhinaca barashada iyo xifdinta Qur’aanka Kariimka.
