Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud ayaa maanta xarigga ka jaray dhismaha cusub ee xarunta dhexe ee Wasaaradda Dhallinyarada iyo Ciyaaraha, taas oo dowladda federaalka ku tilmaamtay tallaabo muhiim u ah horumarinta adeegyada dhallinyarada iyo taageerada ciyaaraha dalka.
Munaasabadda furitaanka oo ka dhacday magaalada Muqdisho ayaa waxaa ka qeyb-galay xubno ka tirsan golaha wasiirrada, maamulka gobolka Banaadir, mas’uuliyiin kale oo dowladda ah, dhallinyaro iyo marti sharaf lagu casuumay munaasabaddaasi.
Madaxweyne Xasan Sheekh ayaa sheegay in xaruntan cusub ay leedahay muhiimad gaar ah, maadaama lagu hirgeliyay awood iyo aqoon Soomaaliyeed. Wuxuu tilmaamay in dhismahan uu astaan u yahay dadaalka lagu doonayo in lagu kobciyo kaalinta dhallinyarada ee dib u dhiska iyo horumarinta dalka.
Sidoo kale, madaxweynaha ayaa bogaadiyay Wasaaradda Dhallinyarada iyo Ciyaaraha, isaga oo ku ammaanay dadaallada ay ku bixisay hirgelinta xaruntan casriga ah. Wuxuu xusay in dowladda federaalka ay mudnaan gaar ah siinayso horumarinta dhallinyarada Soomaaliyeed oo uu ku tilmaamay laf-dhabarta mustaqbalka dalka.
Khudbad uu ka jeediyay munaasabadda ayuu madaxweynuhu sidoo kale kaga hadlay arrimaha amniga, dhammaystirka dastuurka iyo hirgelinta doorashooyinka tooska ah ee dowladda hadda waddo. Wuxuu sheegay in dowladdu ay xoogga saareyso dhismaha hay’ado dowladeed oo ku shaqeeya nidaam sharci iyo isla xisaabtan.
Madaxweyne Xasan Sheekh ayaa intaas ku daray in dhammaan ajendeyaasha dowladda lagu saleeyn doono dastuurka dalka, si loo xaqiijiyo nidaam dowladeed oo ku dhisan sharciyad iyo matalaad dadweyne.
Furitaanka xaruntan cusub ayaa kusoo aadaya xilli dowladda federaalka ay waddo qorshayaal la xiriira horumarinta adeegyada bulshada iyo xoojinta ka qeybgalka dhallinyarada ee arrimaha dowladnimada iyo nabadeynta dalka.
