Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud ayaa maanta ubax xusuuseed dhigay taallada dhallinyaradii halgamayaasha ahaa ee SYL, munaasabad lagu maamuusayay 83-guurada kasoo wareegtay aasaaskii ururkaas taariikhiga ahaa.
Munaasabadda ayaa ka dhacday fagaaraha taallada SYL ee ku dhow Villa Somalia, waxaana kasoo qayb galay mas’uuliyiin ka tirsan dowladda federaalka, maamulka gobolka Banaadir, ururrada dhallinyarada iyo xubno ka socday bulshada rayidka ah.
Madaxweyne Xasan Sheekh ayaa si rasmi ah ubaxa ugu dhigay taallada SYL, iyadoo la filayay inuu munaasabadda ka jeediyo khudbad diiradda lagu saarayo doorkii ay dhallinyaradii SYL ku lahaayeen halgankii gobannimo-doonka Soomaaliya iyo muhiimadda ay leedahay ilaalinta midnimada iyo dowladnimada dalka.
Sidoo kale, wasiir ku-xigeenka dhalinyarada iyo ciyaaraha Soomaaliya, Dahabo Suusow ayaa sheegtay in shacabka Soomaaliyeed, gaar ahaan dhalinyarada, ay si weyn u xusuustaan geesiyadii SYL ee u istaagay xorriyadda iyo karaamada ummadda Soomaaliyeed.
Dhankiisa, Guddoomiyaha gobolka Banaadir ahna Duqa Magaalada Muqdisho, Xasan Maxamed Xuseen Muungaab ayaa sheegay in dhallinyaradii SYL ay lahaayeen aragti mideysan oo ku saabsan badbaadinta dalka iyo shacabka Soomaaliyeed.
15-ka May sanadkii 1943-dii ayaa la aasaasay ururka SYL, oo ay dhiseen dhalinyaro Soomaaliyeed oo hormuud u noqday halgankii gobannimo-doonka dalka, iyadoo Soomaaliya ay 17 sano kadib heshay madax bannaanideeda.
