Wararka24: Madaxweynaha Soomaaliya Xassan Sheekh Maxamud ayaa maanta khudbad uu u jeediyay shacabka kaga hadlay doorashooyinka ka socda maamulka Koonfur Galbeed, bannaanbaxa mucaaradka iyo gogosha wadahadalka ee dowladda u fidisay dhinacyada siyaasadda. Madaxweynaha ayaa sheegay in dalka uu galay marxalad cusub oo ku wajahan doorasho qof iyo cod ah.
Xasan Sheekh ayaa tilmaamay in doorashooyinka goleyaasha deegaanka iyo golaha wakiillada ee maanta ka dhacay Koonfur Galbeed ay yihiin dhacdo muhiim ah oo taariikhi ah. Wuxuu sheegay in shacabka Soomaaliyeed mar kale heleen fursad ay si toos ah ugu cabbiraan rabitaankooda siyaasadeed.
Madaxweynaha ayaa xusay in nidaamka doorasho qof iyo cod uu yahay mid ka tarjumaya rabitaanka shacabka, islamarkaana dowladda federaalka ay ka go’an tahay in nidaamkaas laga hirgeliyo guud ahaan dalka. Wuxuu sheegay in dowladdu sii waddo qorshaha dhameystirka hannaanka dimuqraadiyadeed.
Dhanka kale, Xasan Sheekh ayaa mucaaradka ku eedeeyay in aanay muujin niyad wanaagsan, isagoo su’aal geliyay waqtiga ay doorteen bannaanbaxa. Wuxuu sheegay in dowladda ay hore ugu baaqday shir hordhac ah oo wadahadal siyaasadeed ah, balse mucaaradka ay doorteen waddo kale.
Madaxweynaha ayaa sidoo kale sheegay in dowladda ay oggolaatay in bannaanbaxu dhaco, balse lagu qabto goob cayiman si loo ilaaliyo amniga iyo kala dambeynta. Wuxuu xusay in shacabka Soomaaliyeed ay si dhow u fahmeen xaaladda, islamarkaana ay muujiyeen mowqifkooda.
Doorashooyinka Koonfur Galbeed ayaa maanta ka dhacay 13 degmo oo ka tirsan gobollada Shabeellaha Hoose, Bay iyo Bakool. Guddiga doorashada ayaa sheegay in 15 urur siyaasadeed iyo boqolaal musharrax ay ku tartamayaan kuraasta golaha wakiillada iyo goleyaasha deegaanka, iyadoo shacabka ay si toos ah codkooda u dhiibteen.
DAAWO
