Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa xalay magaalada Muqdisho kaga qeyb galay munaasabad lagu maamuusayay 66-guurada ka soo wareegtay xorriyaddii gobollada Koonfureed iyo midowgii Waqooyi iyo Koonfur ee dhaliyay Jamhuuriyadda Soomaaliya.
Madaxweynaha ayaa si kedis ah ula dabaal-degay shacabka ku dhaqan caasimadda, isaga oo booqday goobo ka mid ah magaalada Muqdisho, gaar ahaan isgoyska Taleex, halkaas oo ay isugu soo baxeen dadweyne faro badan.
Markii ay saacaddu ku beegneyd 12:00 habeenimo ayaa si rasmi ah loo taagay calanka Soomaaliya, iyadoo kooxda baandada Ciidanka Xoogga Dalka Soomaaliyeed ay tumayeen astaanta qaranka, waxaana munaasabadda hareeyay jawi dabaal-deg iyo xusuus qaran.
Madaxweyne Xasan Sheekh ayaa sheegay in maalmaha 26-ka Juun iyo 1-da Luulyo ay xambaarsan yihiin qiime taariikhi ah oo ka tarjumaya halgankii loo soo maray xorriyadda iyo dowladnimada Soomaaliya. Wuxuu ammaan u jeediyay dadkii ka qeyb qaatay halgankii gobannimada iyo dhismaha qaranka Soomaaliyeed.
Sidoo kale, madaxweynaha ayaa tilmaamay in ilaalinta midnimada iyo wadajirka dalka ay tahay masuuliyad saaran jiilasha maanta jira, isaga oo xusay in shacabka Soomaaliyeed looga baahan yahay inay sii xoojiyaan dadaallada lagu horumarinayo dowladnimada iyo nabadda.
Xasan Sheekh ayaa sheegay in muuqaalka dadka habeenkii ku dabaaldegaya waddooyinka Muqdisho uu ka tarjumayo horumarka laga gaaray dhinaca amniga, isaga oo xusay in dowladdu sii wadayso dadaallada lagu xoojinayo xasilloonida iyo dib u dhiska dalka.
Madaxweynaha ayaa sidoo kale farriin u diray bulshada Somaliland, isaga oo adkeeyay muhiimadda wada-hadallada iyo raadinta xalal lagu xallin karo tabashooyinka jira, si loo gaaro is-afgarad waara oo dhex mara dhinacyada Soomaaliyeed.
Ugu dambeyn, Madaxweynaha Jamhuuriyadda ayaa ku baaqay in la ilaaliyo midnimada, wadajirka iyo qiyamka qarannimada, isaga oo sheegay in jiilalka cusub ay masuul ka yihiin sii ambaqaadidda himiladii ay u soo halgameen aasaasayaashii qaranka Soomaaliyeed.
