Wararka24: Madaxweynaha Jamhuuriyadda Federaalka Soomaaliya, Xasan Sheikh Maxamuud ayaa sheegay in muddo xileedka dowladda federaalka uu si rasmi ah ku eg yahay 15-ka May 2027, isaga oo xusay in arrintaasi waafaqsan tahay dastuurka cusub ee la dhaqan geliyay.
Khudbad uu ka jeediyay munaasabadda xuska maalinta dhallinyarada Soomaaliyeed ee SYL ayaa madaxweynuhu ku sheegay in dastuurka cusub uu dhigayo in muddo xileedka dowladda iyo baarlamaanka uu noqdo shan sano, islamarkaana dowladda hadda jirta ay ku shaqeyn doonto nidaamkaas.
Madaxweyne Xasan Sheekh ayaa sheegay in qorshaha dowladda uu yahay hirgelinta doorasho qof iyo cod ah, isaga oo tilmaamay in dowladdu ay fulineyso ballanqaadyadii ay shacabka u samaysay, sida dhameystirka dastuurka, nidaamka xisbiyada badan iyo ka guurista doorashooyinka dadban.
Sidoo kale, wuxuu sheegay in Soomaaliya ay horumar ka sameysay dhinacyada dowlad dhiska, xiriirka caalamiga ah iyo dib u soo kabashada hay’adaha dhaqaalaha dalka. Madaxweynaha ayaa tusaale u soo qaatay ka mid noqoshada Soomaaliya ee Golaha Ammaanka ee Qaramada Midoobay iyo dib u habeynta bangiga dhexe.
Madaxweynaha ayaa dhaliilay siyaasiyiinta kasoo horjeeda nidaamka doorashada qof iyo codka, isaga oo sheegay in qaar kamid ah mucaaradka ay doonayaan in dalka lagu sii hayo nidaamkii hore ee 4.5 iyo doorashooyinka dadban.
Dhanka kale, Xasan Sheekh ayaa sheegay in dowladda ay diyaar u tahay inay dhegeysato aragtiyada mucaaradka iyo siyaasiyiinta kale, balse uu ku adkeystay in dastuurka hadda la dhaqan geliyay uu yahay mid sharci ah oo dalka lagu maamulayo.
Hadalka madaxweynaha ayaa kusoo aadaya xilli uu cirka isku shareeray khilaafka siyaasadeed ee u dhexeeya dowladda federaalka iyo mucaaradka, kuwaas oo isku mari la’ arrimaha doorashooyinka, dastuurka iyo muddo xileedka dowladda.
Qaar kamid ah siyaasiyiinta mucaaradka ayaa hore u sheegay in aysan sharci u aqoonsanayn sii joogitaanka dowladda hadda jirta, kadib markii aan heshiis laga gaarin shirarkii wadatashiga ee ka dhacay magaalada Muqdisho.
