Wararka24: 9-02-2026 Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si rasmi ah u xaqiijiyay in uu mar kale u tartamayo xilka madaxweynaha, xilli dalka uu isu diyaarinayo doorashooyin la filayo inay ka duwanaadaan kuwii hore.
Wareysi uu siiyay Aljazeera, Madaxweynaha ayaa sheegay in Dastuurka KMG ah uu oggolaanayo in madaxweyne la doorto laba jeer oo xiriir ah, isaga oo xusay in uusan horey u helin laba xilli oo is-daba-joog ah, taasoo sharci ahaan u oggolaanaysa inuu mar kale isu taago. “Doorashooyinku waa soo socdaan, aniguna waan u taaganahay. Doorashadan way ka duwan tahay kuwii hore, waxaan rabnaa doorasho ku saleysan axsaab siyaasadeed iyo dastuur cusub,” ayuu yiri.
Madaxweyne Xasan Sheekh ayaa difaacay waxqabadkii dowladdiisa, isaga oo sheegay in horumar laga sameeyay la-dagaallanka Al-Shabaab, dib-u-dhiska hay’adaha dowliga ah iyo xoreynta deegaanno ka tirsan dalka. Wuxuu xusay in tan iyo 2022 ay dowladda hirgelisay istaraatiijiyad amni oo cusub oo keentay in kooxda laga saaro deegaanno badan, isla markaana hoos loo dhigo awooddii dhaqaale iyo weerar ee kooxda.
Madaxweynaha ayaa sidoo kale tilmaamay horumar laga gaaray kaabeyaasha dhaqaalaha, sida dekedaha, garoomada diyaaradaha, isbitaallada iyo waddooyinka. Wuxuu xusay in Soomaaliya laga qaaday cunaqabateyntii hubka ee Qaramada Midoobay, isla markaana lagu guuleystay cafinta deyn ka badan $5 bilyan, arrimo uu ku tilmaamay guulo waaweyn oo dowladda gaartay.
Dhanka kale, hadalkan ayaa kusoo aadaya xilli ay jiraan walaacyo siyaasadeed oo ku saabsan habraaca doorashooyinka soo socda, iyadoo aysan weli caddayn in la qaban karo doorasho qof iyo cod ah, halka siyaasiyiin mucaarad ah ay ka digeen khilaafyo iyo muran ka dhasha muddo kororsi.
