Wararka24: Xaaladda guud ee magaalada Muqdisho ayaa maanta deggan, kadib xiisado iyo dhaq-dhaqaaqyo ciidan oo maalmihii lasoo dhaafay laga dareemayay qaybo kamid ah caasimadda.
Inkasta oo xaaladdu ay deggen tahay, haddana wararka ayaa sheegaya in aan weli la kala qaadin ciidamada Dowladda Federaalka Soomaaliya iyo kuwa ilaalada u ah Madaxweynihii hore ee Soomaaliya, Sheekh Shariif Sheekh Axmed. Ciidamada ilaalada Sheekh Shariif ayaa la sheegay inay weli ku sugan yihiin degmada Cabdicasiis.
Dhinaca kale, waxaa socda dadaallo isugu jira waanwaan iyo wada-hadallo lagu doonayo in lagu dejiyo xiisadda siyaasadeed ee u dhexeysa dowladda iyo mucaaradka. Odayaal dhaqameed, siyaasiyiin iyo mas’uuliyiin kala duwan ayaa ka shaqeynaya sidii loo gaari lahaa is-afgarad siyaasadeed.
Saameynta xiisadda ayaa sidoo kale laga dareemay magaalada, iyadoo maanta ay yaraadeen dadkii booqan jiray Xeebta Liido, oo ka mid ah meelaha ugu mashquulka badan Muqdisho maalmaha fasaxa.
Wararka ayaa sidoo kale sheegaya in wafdi ka socda Turkiga uu dalka yimid si uu uga qeyb qaato dadaallada lagu xallinayo khilaafka siyaasadeed, iyadoo beesha caalamku ku baaqday in dhinacyadu ku xalliyaan murankooda wada-hadal iyo is-afgarad.
Khilaafka siyaasadeed ayaa salka ku haya arrimo la xiriira doorashooyinka, wax-ka-beddelka dastuurka iyo muddada xilalka hay’adaha federaalka. Wada-hadallo hore oo dhex maray Dowladda Federaalka iyo xubnaha mucaaradka ayaa kusoo dhammaaday natiijo la’aan bartamihii bishii May.
Mucaaradka ayaa ku doodaya in arrimaha doorashooyinka iyo maamulka dalka ay u baahan yihiin heshiis siyaasadeed oo ballaaran, halka Dowladda Federaalka ay ku adkeysaneyso hirgelinta nidaamka doorashada qof iyo cod, oo ay ku tilmaantay tallaabo muhiim ah oo lagu horumarinayo dimuqraadiyadda dalka.
Dhanka kale, waxaa weli taagan walaaca laga qabo in khilaafka siyaasadeed uu sii xoogeysto, iyadoo Soomaaliya ay wajahayso caqabado amni oo ay kamid yihiin weerarrada Al-Shabaab iyo xaalado bini’aadantinimo oo soo noqnoqda.
Beesha caalamka, oo ay kamid yihiin Qaramada midobay, IGAD, Mareykanka iyo Ingiriiska, ayaa sii wada baaqyada ku aaddan in khilaafka lagu xalliyo wada-hadal, si looga hortago in xaaladdu gaarto heerkii xiisadda siyaasadeed ee sanadkii 2021.
