Wararka24: Ra’iisul Wasaarihii hore ee Soomaaliya, Cumar Cabdirashiid Cali Sharmaarke, ayaa ugu baaqay dowladda Federaalka iyo mucaaradka inay muujiyaan is-xakameyn, xilli ay sii kordhayaan xiisadaha siyaasadeed iyo kuwa amni ee dalka.
Cumar Cabdirashiid ayaa sheegay in Soomaaliya ay hore u soo martay xaalado siyaasadeed oo la mid ah kuwa hadda taagan, isagoo xusay in waayo-aragnimada laga bartay marxaladihii hore ay muujisay in wada-hadalka iyo is-afgaradku yihiin waddada ugu habboon ee lagu xallin karo khilaafaadka.
Wuxuu tilmaamay in dalka uu weli wajahayo khatarta kooxda Al-Shabaab, sidaas darteedna aysan jirin fursad loo oggolaan karo khilaaf cusub oo wax u dhimaya amniga iyo dadaallada lagu sugayo xasilloonida.
Ra’iisul Wasaarihii hore ayaa sidoo kale ka digay in sii kordhinta xiisadaha siyaasadeed ay keeni karto kala qaybsanaan dheeraad ah, gaar ahaan hay’adaha amniga, taas oo saameyn ku yeelan karta awoodda dowladda ee la tacaalidda caqabadaha jira.
Dhanka kale, wuxuu ku baaqay in mudaharaadyada iyo dhaqdhaqaaqyada siyaasadeed ee la qorsheeyay ay u dhacaan si nabad ah, isagoo xusay in dowladda ay saaran tahay masuuliyadda ugu weyn ee ilaalinta amniga shacabka iyo ka hortagga isku dhacyo hor leh.
Cumar Cabdirashiid ayaa ugu dambeyn ku baaqay in si degdeg ah loo bilaabo wada-hadal siyaasadeed oo loo dhan yahay, si xal waara looga gaaro murannada la xiriira doorashooyinka iyo arrimaha siyaasadeed ee taagan.
Baaqan ayaa kusoo aadaya xilli ay socdaan dadaallo gudaha iyo dibadda ah oo lagu doonayo in lagu dejiyo xiisadaha ka jira magaalada Muqdisho, iyadoo dhinacyo kala duwan ay ku baaqayaan in mudnaanta la siiyo wada-hadal iyo xal nabadeed.
