Wararka24: 2-02-2026: Raysal-wasaarihii hore ee Turkiga, Ahmet Davutoğlu, ayaa shaaca ka qaaday in sannadkii 2012 uu ka hor istaagay qorshe uu Ingiriisku dabada ka riixayay, kaas oo lagu doonayay in Midowga Yurub uu Somaliland ugu aqoonsado dal madax-bannaan.
Davutoğlu ayaa sheegay in Xoghayihii Arrimaha Dibadda ee Ingiriiska xilligaas, William Hague, uu ku hawlanaa qancinta dalalka Yurub si ay u aqoonsadaan Somaliland, maadaama ay ahayd deegaan deggan oo leh hannaan dimuqraadi ah, halka Soomaaliya ay xilligaas la daalaa-dhacaysay qalalaase iyo dowlad-la’aan. Hase yeeshee, Davutoğlu ayaa sheegay inuu si cad uga horyimid dadaalkaas, kaddib shir ay wada yeesheen madaxda Turkiga iyo Ingiriiska.
“Markii aan kulanka soo galay, ololaha aqoonsiga Somaliland meel wanaagsan ayuu marayay. Waxaan ku iri: maxaad samaynaysaa? Annagu Soomaaliya ayaanu isku dayaynaa inaan xasilinno, adiguna waad kala qaybinaysaa,” ayuu yiri Davutoğlu. Wuxuu intaa ku daray inuu Hague u sheegay in aqoonsiga Somaliland uu sidoo kale macno ahaan furi karo albaab aqoonsi loo fidiyo Jamhuuriyadda Waqooyiga Qubrus, taas oo Turkigu taageero, arrintaas oo la yaab ku noqotay ka qaybgalayaashii shirka.
Davutoğlu ayaa sheegay inuu isla maalintaas la xiriiray Madaxweynihii Somaliland ee xilligaas, Axmed Maxamed Maxamuud (Siilaanyo), iyo Madaxweynihii Dowladda Ku-meelgaarka ah ee Soomaaliya, Sheekh Shariif Sheekh Axmed, isagoo ku booriyay in arrimaha Soomaaliya lagu xalliyo gacmahooda, isla markaana aan loo ogolaan faragelin shisheeye. Wuxuu xusay in Turkigu markaas kaddib martigeliyay wadahadallo u dhexeeya Somaliland iyo Soomaaliya, si loo muujiyo in arrinta aqoonsigu weli miiska saaran tahay wada-hadal.
Wadahadalladaas oo socday in ka badan toban sano balse aan wax natiijo ah laga gaarin, ayaa dad badan oo reer Somaliland ah u arkaan inay ahaayeen xeelad dib u dhigaysa dadaallada aqoonsi-raadinta, halka kuwo kalena ay rumeysan yihiin in fursad la siiyay xal wada-hadal ah. Xiriirka Muqdisho iyo Hargeysa ayaa si weyn u xumaaday kaddib burburkii wadahadallada iyo khilaafyo la xiriira dhismaha maamullada gobollada lagu muransan yahay.
Dhanka kale, Golaha Wasiirrada Soomaaliya ayaa dhawaan ku daray fikirka gooni-u-goosadka khatarta weyn ee dalka wajahaya, iyagoo la simay halista argagixisada. Arrintan ayaa kusoo beegantay xilli Somaliland ay markii ugu horreysay heshay aqoonsi buuxa oo caalami ah 26-kii December ee sannadkii hore, kaddib markii dowladda Israa’iil ku dhawaaqday inay si rasmi ah u aqoonsatay.
