Wararka24: 3-02-2026: Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa laga dalbaday inuu raalligelin ka bixiyo tallaabadii hawada loogu celiyay diyaarado siday ilaalada Madaxweynayaasha Puntland iyo Jubbaland, arrintaas oo dhalisay falcelin ballaaran oo ka timid bulshooyinka ku nool labada maamul.
Qaar ka mid ah shacabka ku nool magaalada Garoowe ayaa sheegay in go’aankaas uu muujinayo cadaadis lagu hayo Puntland, iyagoo xusay in xaaladdaasi ay sii fogeysay kalsoonidii u dhaxeysay dowladda Federaalka iyo Puntland. Dadkaasi waxay ku baaqeen in Madaxweynaha Puntland, Saciid Cabdullaahi Deni, uusan tegin Muqdisho inta uu dhammaanayo muddo xileedka Madaxweynaha Soomaaliya.
Dhanka kale, odayaasha dhaqanka Jubbaland oo warbaahinta kula hadlay magaalada Kismaayo ayaa si adag u cambaareeyay tallaabada lagu hor istaagay ilaalada madaxweynaha, iyagoo ku tilmaamay mid halis amni abuureysa. Odayaashu waxay sheegeen in dowladda Federaalka looga baahan yahay inay si cad raalligelin uga bixiso dhacdadaasi ka hor inta aysan dib ugu laaban Muqdisho ciidamadii la celiyay.
Arrintan ayaa kusoo aadeysa xilli ay taagan yihiin khilaafaad siyaasadeed oo la xiriira arrimaha doorashooyinka iyo wada-shaqeynta u dhaxeysa dowladda dhexe iyo qaar ka mid ah maamul goboleedyada, iyadoo weli laga sugayo dowladda Federaalka mowqif rasmi ah oo ku saabsan dalabyada loo jeediyay.
