Wararka24: 3-02-2026:Siyaasiyiin ku sugan Muqdisho ayaa taageero u muujiyay go’aankii lagu hakiyay gelitaanka ilaalada Madaxweynayaasha Puntland iyo Jubbaland, kuwaas oo la filayay inay ka qeyb galaan shir looga hadlayay arrimaha doorashooyinka, balse dib loogu celiyay garoonka diyaaradaha.
Warbaahinta ku hadasha afka dowladda Federaalka Soomaaliya ayaa saacadihii la soo dhaafay baahisay muuqaallo lagu difaacayo tallaabadaas, iyadoo la soo bandhigay masuuliyiin hore iyo kuwo xilal ka haya dowladda oo sheegay in amniga caasimadda uu yahay mid sugan, isla markaana aan loo baahnayn in hoggaamiyeyaasha kasoo qeybgala shirarka ay la yimaadaan ciidamo u gaar ah.
Farxaan Cali Axmed, Wasiiru-dowlihii hore ee Wasaaradda Amniga, ayaa sheegay in Muqdisho ay marayso marxalad amni oo wanaagsan, uuna amnigu gaaray heer aan horey loo arag. “Magaalada Muqdisho maanta maalin ay ka ammaan badan tahay nama soo marin, mana ah magaalo ilaalo loo soo kaxeysto,” ayuu yiri.
Dhanka kale, warbaahinta dowladda ayaa sidoo kale baahisay hadallo ka yimid xubno ka tirsan golaha deegaanka Gobolka Banaadir, kuwaas oo sheegay in dowladda Federaalka ay xaqiijisay amniga caasimadda. Mid kamid ah xildhibaanadaas, Cabdiraxmaan Caseyr, ayaa sheegay in amniga Muqdisho yahay mid lagu kalsoonaan karo, isla markaana dowladda lagu ammaani karo dadaalka ay ka sameysay sugidda amniga.
Arrintan ayaa kusoo beegmeysa xilli inta badan waddooyinka muhiimka ah ee ku yaalla xarumaha dowladda ay xiran yihiin, iyadoo dood ka dhalatay habka loo maareeyay amniga iyo ka qeybgalka hoggaamiyeyaasha maamul goboleedyada ee shirarka siyaasadeed.
