Washington – Madaxweynaha Mareykanka, Donald Trump, ayaa sheegay in inkasta oo Israel laga yaabo inay guulo ka gaarto dagaalka ka socda Qaza, haddana ay si weyn ugu guuldarraysanayso saamaynteedii gudaha Mareykanka iyo aragtida caalamka, taas oo dhaawac culus ku ah Tel Aviv.
Trump oo wareysi siiyay wargeyska Daily Caller ayaa xusay in 20 sano ka hor Israel ay lahayd saamayntii ugu xoogga badnayd ee Aqalka Congress-ka Mareykanka, balse maanta awooddaasi si muuqata hoos ugu dhacday. Wuxuu arrintan ku tilmaamay mid “wax lala yaabo,” maadaama uu sheegay in horey ay adkayd in siyaasi Mareykan ah uu Israel si xun uga hadlo.
Tyump ayaa intaas ku daray in taageerada Israel ee gudaha Mareykanka, xitaa Xisbiga Jamhuuriga dhexdiisa, ay si degdeg ah u sii yaraanayso. Wuxuu ku celceliyay in Israel ay tahay inay dagaalka Qaza soo afjarto, si looga baaqsado dhaawaca siyaasadeed iyo sumcad xumo sii kordhaysa oo ka imaan karta gudaha iyo dibadda labadaba.
