Wararka24: Taliyihii hore ee Ciidanka Asluubta Soomaaliya, Mahad Cabdiraxmaan (Shub), ayaa markii ugu horreysay ka hadlay xil ka qaadistiisii iyo xabsi gurigii lagu hayay, isagoo eedeymo culus u jeediyay Madaxweynaha Soomaaliya.
Shub oo ku sugan magaalada Nairobi ayaa sheegay in awood dowladeed looga saaray gurigiisa, isagoo xusay in amar ka yimid Madaxweyne Xasan Sheekh uu sababay inuu ka guuro hoygiisa.
“Guryaha anaa dhistay oo iska lahaa, haddana amar ayaa looga guuray,” ayuu yiri Taliye Shub.
Sidoo kale, wuxuu dhaliilay Taliyaha cusub ee Ciidanka Asluubta, isagoo ku eedeeyay inuu ku kacay falal beegsi ah oo ku saleysan qabiil, inkastoo aan eedahaasi si madax-bannaan loo xaqiijin.
Taliyihii hore ayaa iska fogeeyay eedeymo la xiriira musuq ama ku takri fal hanti, isagoo sheegay inuu door muuqda ka qaatay horumarinta ciidanka Asluubta intii uu xilka hayay.
Wuxuu intaas ku daray in xil ka qaadista iyo magacaabista ay ka mid yihiin habraacyada dowladeed, isla markaana ay suuragal tahay in mar kale loo magacaabo xil dowladeed.
Hadalka Shub ayaa kusoo aadaya xilli ay weli taagan tahay xiisad siyaasadeed oo la xiriirta isbeddellada ka socda Koonfur Galbeed iyo gudaha dowladda federaalka.
