Wararka24: Ra’iisul Wasaaraha Xukuumadda Federaalka Soomaaliya, Xamza Cabdi Barre, ayaa shaaciyay in maamulka Koonfur Galbeed uu galay marxalad cusub oo lagu wajahayo doorasho qof iyo cod ah, kadib isbeddelladii ugu dambeeyay ee ka dhacay magaalada Baydhabo.
Ra’iisul Wasaaraha ayaa sheegay in dowladda aysan oggolaan doonin wax qalalaase ah ama aargoosi siyaasadeed, isla markaana la xaqiijin doono amniga guud ee magaalada Baydhabo oo ay hadda gacanta ku hayaan ciidamada dowladda.
Wuxuu tilmaamay in shacabka Koonfur Galbeed ay heli doonaan hoggaan ay si xor ah u doortaan, isagoo sheegay in aan la aqbali doonin in mar kale lagu celiyo nidaamyo hore oo lagu soo xuli jiray hoggaanka.
“Dadka reer Koonfur Galbeed waxay yeelan doonaan madax aan lagu qasbin, balse ay iyagu soo doortaan,” ayuu yiri Ra’iisul Wasaare Xamza Cabdi Barre.
Sidoo kale, wuxuu si cad u sheegay in aan laga oggolaan doonin Baydhabo iyo guud ahaan Koonfur Galbeed wax doorasho ah oo aan ahayn qof iyo cod, isagoo uga digay siyaasiyiinta ka aragti duwan qorshaha dowladda.
Hadalkan ayaa kusoo aadaya xilli ciidamada Dowladda Federaalka Soomaaliya ay la wareegeen magaalada Baydhabo, kadib dhaqdhaqaaqyo militari oo maalmahan ka socday gobolka Baay.
Dhanka kale, Cabdicasiis Xasan Maxamed Lafta-gareen ayaa la sheegay inuu u duulay dalka Kenya, isagoo horay u magacaabay ku-simaha madaxweynaha Koonfur Galbeed si uu u sii wado maamulka inta xal laga gaarayo xaaladda taagan.
Xukuumadda Federaalka Soomaaliya ayaa hadda qorsheynaysa inay hirgeliso maamul cusub oo ku dhisan nidaamka doorasho qof iyo cod ah, inkastoo ay arrintan ka hor yimaadeen qaar ka mid ah siyaasiyiinta mucaaradka iyo madaxda dowlad-goboleedyada qaarkood.
DAAWA
