Wararka24: Cabdicasiis Xasan Maxamed (Lafta-gareen) ayaa weli ku adkeysanaya inuu yahay madaxweynaha sharciga ah ee Koonfur Galbeed, inkastoo isbeddello siyaasadeed ay ka dhaceen Baydhaba.
Ilo xog ogaal ah ayaa sheegaya in Lafta-gareen, oo haatan ku sugan magaalada Nairobi, uu diiday inuu aqbalo in xilka laga qaaday, isla markaana uu weli isku arko hoggaamiyaha maamulka.
Wararka ayaa sidoo kale tilmaamaya in qoraalkii is-casilaadda ee uu horay u baahiyay uu mar qariyay kadibna dib loo soo celiyay, arrintaas oo dhalisay su’aalo badan.
Xubno ku dhow Lafta-gareen ayaa sheegay in cadaadis lagu saaray intii uu ku sugnaa Baydhaba, islamarkaana uu ku doodayo in xaalad qasab ah lagu geliyay go’aannadii uu qaatay.
Dhanka kale, Dowladda Federaalka Soomaaliya ayaa wada dadaallo ay ku dhiseyso maamul ku-meel-gaar ah, iyadoo qorshuhu yahay in la qabto doorasho qof iyo cod ah.
Xaaladda Koonfur Galbeed ayaa weli ah mid xasaasi ah, iyadoo siyaasiyiin iyo mas’uuliyiin federaal ah ay kusii qulqulayaan magaalada Baydhaba.
Arrintan ayaa kusoo aadeysa xilli la filayo in Madaxweynaha Soomaaliya uu safar ku tago Baydhaba si uu ula socdo xaaladda cusub ee maamulka.
