Wararka24: Dowladda Federaalka Soomaaliya ayaa ku dhawaaqday inay ku biirtay 15 heshiis, baratakool iyo lifaaqyo sharciyeed oo caalami ah oo khuseeya arrimaha badaha, iyadoo tallaabadan lagu tilmaamay tii ugu ballaarneyd ee lagu horumarinayo nidaamka sharciyeed ee badda tan iyo xornimadii dalka.
War-saxaafadeed kasoo baxay Wasaaradda Dekedaha iyo Gaadiidka Badda ayaa lagu sheegay in heshiisyadan ay xoojinayaan awoodda Soomaaliya ee dhinacyada badqabka maraakiibta, amniga badaha, ilaalinta deegaanka badda iyo fududeynta ganacsiga caalamiga ah ee gaadiidka badda.
Wasaaraddu waxay xustay in Soomaaliya oo leh xeebta ugu dheer Afrika isla markaana ku taalla marin-biyood istiraatiiji ah ay tan iyo sanadkii 1960-kii ku biirtay saddex heshiis oo keliya oo la xiriira arrimaha badaha, halka hadda la qaaday tallaabo ballaaran oo lagu casriyeynayo nidaamkaas.
Sida lagu sheegay war-saxaafadeedka, ku biirista heshiisyadan ayaa meesha ka saaraysa caqabado muddo dheer hortaagnaa ka mid noqoshada Soomaaliya ee nidaamka caalamiga ah ee gaadiidka badda, waxaana la filayaa inay sare u qaaddo kalsoonida maalgashadayaasha iyo shirkadaha ka shaqeeya gaadiidka badda.
Heshiisyada cusub ayaa isugu jira kuwo la xiriira baadigoobka iyo samatabbixinta badda, tababarka iyo shahaado-siinta badmaaxiinta, ka hortagga isku dhacyada maraakiibta, ilaalinta badbaadada nolosha badda iyo la dagaallanka wasakhowga deegaanka.
Waxa kale oo heshiisyadan ay khuseeyaan magdhowga waxyeellada deegaanka, xoojinta amniga badaha iyo horumarinta hannaanka ganacsiga caalamiga ah ee ku saleysan gaadiidka badda.
Wasaaradda Dekedaha iyo Gaadiidka Badda ayaa sheegtay in tallaabadan ay qeyb ka tahay qorshaha dib-u-habaynta hay’adaha dowladda, isla markaana ay waafaqsan tahay himilooyinka DanQaran iyo Qorshaha Isbeddelka Qaranka ee Soomaaliya.
Mas’uuliyiinta dowladda ayaa aaminsan in ku biirista heshiisyadan ay Soomaaliya u horseedi karto fursado cusub oo dhinacyada maalgashiga, ganacsiga iyo horumarinta kaabeyaasha dhaqaalaha badda.
