Wararka24: Wasiirka Gaashaandhigga Soomaaliya, Axmed Macallin Fiqi, ayaa ka hadlay go’aanka Madaxweynaha Galmudug, Axmed Cabdi Kaariye (Qoor-Qoor), ee uu uga haray tartanka musharaxnimada madaxweynaha maamulkaasi.
Fiqi ayaa bogaadiyay tallaabada uu qaaday Qoor-Qoor, isaga oo ku tilmaamay mid muujinaysa isu-tanaasul, isfaham iyo biseyl siyaasadeed oo ka hanaqaaday Galmudug.
“Waxaan bogaadinayaa waaga cusub ee siyaasadeed ee u baryay Galmudug ee isu-tanaasulka, isfahamka iyo biseylka ee Galmudug ka hanaqaaday,” ayuu yiri Wasiir Fiqi.
Wasiirka ayaa sidoo kale sheegay in Madaxweyne Qoor-Qoor uu door muuqda ka qaatay horumarinta Galmudug, isagoo xusay in maamulku uu ku tallaabsaday waxqabadyo kala duwan muddadii uu xilka hayay.
Fiqi wuxuu sheegay in Galmudug ay caan ku tahay wadaninimo, isla markaana aysan ka mid ahayn meelaha laga abaabulo qorshayaal lagu dhaawacayo qaranimada Soomaaliya. Wuxuu tilmaamay in tanaasulka Qoor-Qoor uu meesha ka saaray waxa uu ugu yeeray shirqoolo siyaasadeed oo ka dhan ahaa maamulka.
Wasiirka Gaashaandhigga ayaa sidoo kale guul u rajeeyay musharraxa Liibaan Axmed Xasan (Liibaan Shuluq), oo la rumeysan yahay inuu taageero ka haysto dowladda federaalka.
Tanaasulka Madaxweyne Qoor-Qoor ayaa soo afjaray doodihii siyaasadeed ee muddooyinkii dambe ka taagnaa Galmudug, kuwaas oo la xiriiray hannaanka doorashooyinka iyo mustaqbalka hoggaanka maamulka.
Waxaa la filayaa in Galmudug ay martigeliso doorashooyin dadweyne, sida ay hore u shaaciyeen guddiyada qaabilsan arrimaha doorashooyinka, iyadoo dhinacyada siyaasadda ay sii wadaan diyaar-garowgooda ku aaddan marxaladda cusub ee maamulka.
