Dowladda Eswatini, oo hore loogu yaqaanay Swaziland, ayaa Khamiistii xaqiijisay inay la wareegtay afar qof oo dheeraad ah oo laga soo tarxiilay Mareykanka, kuwaas oo ay ku jiraan laba muwaadin oo Soomaali ah.
Mas’uuliyiinta Eswatini ayaa sheegay in afartan qof, oo sidoo kale ay ku jiraan hal qof oo u dhashay Suudaan iyo mid u dhashay Tansaaniya, dalkaas la geeyay 11-ka Maarso, isla markaana lagu hayo xabsiga aadka loo ilaaliyo ee Matsapha Correctional Complex oo ku dhow garoonka diyaaradaha caalamiga ah.
Hay’adda xuquuqda aadanaha ee Amnesty International ayaa xaqiijisay in dadka la geeyay ay qayb ka yihiin heshiis dhexmaray Washington iyo dowladda Eswatini, kaas oo u oggolaanaya in dadka laga soo musaafuriyo Mareykanka lagu hayo ama lagu kala shaandheeyo dal saddexaad.
Tallaabadan ayaa tirada guud ee dadka Mareykanka laga soo tarxiilay ee la geeyay Eswatini ka dhigaysa ugu yaraan 19 qof, iyadoo dowladda dalkaas sheegtay in ay socdaan wada-hadallo lala yeelanayo dalalkii ay dadkaasi asal ahaan ka soo jeedeen.
Arrintan ayaa kusoo beegmaysa xilli maamulka Madaxweyne Donald Trump uu qorsheynayo in 17-ka Maarso la joojiyo sharciga Badbaadada Kumeel-gaarka ah ee TPS ee Soomaalida ku nool Mareykanka, barnaamij muddo tobannaan sano ah u oggolaanayay inay si sharci ah dalkaas ugu noolaadaan ugana shaqeystaan.
Qiyaastii 1,082 Soomaali ah ayaa haysta sharcigan, halka in ka badan 1,300 kale ay codsiyadoodu wali la sugayo, sida ay muujinayaan diiwaannada dowladda Mareykanka. Qaar ka mid ah Soomaalida iyo hay’adaha xuquuqda aadanaha ayaa dacwad u gudbiyay maxkamad federaal ah si ay uga hortagaan joojinta
