Wararka24: Hoggaamiyaha Dowlad-goboleedka Koonfur Galbeed, Sheekh Aadan Maxamed Nuur (Aadan Madoobe), ayaa xalay si rasmi ah u magacaabay Golaha Wasiirrada cusub ee maamulkiisa, kadib wareegto uu soo saaray.
Golaha cusub ayaa ka kooban 26 wasiir, 3 wasiiru-dowle iyo 22 wasiir ku-xigeen, sida ku cad liiska ay madaxtooyadu soo bandhigtay. Xubnaha la magacaabay waxaa ku jira xildhibaanno ka tirsan Golaha Wakiillada Koonfur Galbeed, halka qaar kalena laga soo xulay bulshada inteeda kale.
Mas’uuliyiinta cusub ayaa isugu jira dhalinyaro iyo shaqsiyaad hore uga soo shaqeeyay hay’adaha Dowladda Federaalka Soomaaliya iyo maamulka Koonfur Galbeed, iyadoo la filayo inay door ka qaataan dardargelinta howlaha maamulka.
Sheekh Aadan Madoobe ayaa xubnaha cusub kula dardaarmay inay si hufan, daacadnimo iyo mas’uuliyad leh u gutaan waajibaadka loo igmaday, isaga oo xusay in shacabka Koonfur Galbeed ay ka sugayaan adeegyo iyo isbeddel muuqda.
Magacaabistan ayaa qeyb ka ah dhammaystirka dhismaha hay’adaha maamulka Koonfur Galbeed, kadib isbeddelladii siyaasadeed ee dhawaan ka dhacay magaalada Baydhaba, kuwaas oo horseeday isbeddel ku yimid hoggaanka maamulka.
Maalmihii la soo dhaafay, hoggaamiyaha cusub ayaa sidoo kale magacaabay saraakiisha laamaha amniga, isagoo sheegay in mudnaanta la siin doono adkeynta amniga, dib-u-habeynta hay’adaha dowladda iyo horumarinta adeegyada bulshada.
Dowladda Koonfur Galbeed ayaa la filayaa inay maalmaha soo socda billowdo hirgelinta qorshayaasha cusub ee golaha wasiirrada si loo dardargeliyo howlaha maamulka iyo adeegyada shacabka.
Hoos ka akhriso liiska Golaha Wasiirrada Koonfur Galbeed
