Wararka24: Senatorrada laga soo doortay Dowlad-Goboleedka Koonfur Galbeed ayaa bayaan wadajir ah soo saaray, iyaga oo caddeeyay taageeradooda mowqifka maamulkaas, gaar ahaan go’aankii xiriirka loogu jaray Dowladda Federaalka Soomaaliya.
Bayaanka ayaa lagu sheegay: “Anaga oo ah senatarada laga soo doortay Dowlad Goboleedka Koonfur Galbeed, waxaan si buuxa u taageereynaa go’aanka Dowlad Goboleedka Koonfur Galbeed.”
Senatorrada ayaa sidoo kale xusay in tallaabadan ay ka dhalatay faragelin ay dowladda federaalka ku samaysay maamulka, iyo dhibaato ka dhalatay weeraro abaabulan oo ka dhacay deegaannada Koonfur Galbeed.
Waxay ku adkeeyeen in go’aanka hakinta xiriirka dowladda dhexe uu ahaa mid looga jawaabayo faragelin soo noqnoqotay oo waxyeello u geysatay nidaamka dowladnimada iyo xasiloonida deegaanka.
Sidoo kale, senatorrada ayaa ugu baaqay dowladda federaalka inay ixtiraamto nidaamka federaalka, isla markaana ay ka fogaato faragelinta Koonfur Galbeed.
Goor hore, xildhibaannada Golaha Shacabka ee mucaaradka ku ah Madaxweyne Cabdicasiis Laftagareen ayaa iyaguna soo saaray warsaxaafadeed ay ku diideen go’aanka maamulka Koonfur Galbeed, iyaga oo ugu baaqay dowladda dhexe in tallaabo degdeg ah laga qaado, si loo badbaadiyo maamulka loona xaqiijiyo doorasho heshiis lagu wada yahay.
Xiisadda siyaasadeed ee ka taagan Koonfur Galbeed ayaa weli sii xoogeysaneysa, iyadoo meelaha qaar ay ka socdaan dagaallo toos ah, halka deegaanno kale laga dareemayo abaabul ciidan iyo dhaqdhaqaaqyo muujinaya suurtagalnimada isku dhacyo hor leh.
