Wararka24: Dowladda Sacuudi Carabiya ayaa xoojisay taageerada ay siiso ciidamada Soomaaliya, iyadoo wafdi militari oo ka socda dalkaas uu booqday laba xero oo tababar oo ku yaalla degmada Guriceel ee gobolka Galgaduud. Booqashadan ayaa qeyb ka ah barnaamij lagu horumarinayo awoodda Ciidanka Xoogga Dalka Soomaaliyeed.
Sida xogaha la helay ay muujinayaan, barnaamijkan ayaa lagu tababarayaa 5,107 askari oo la qorsheeyay inay ku biiraan ciidamada dowladda Federaalka. Ciidamada tababarka qaadanaya waxaa ku jira ku dhowaad 2,000 oo dhalinyaro ah oo laga soo xulay deegaannada Puntland, halka inta kale laga keenay gobollo kala duwan oo dalka ah.
Tababarka ayaa la filayaa inuu socdo muddo sagaal bilood ah, iyadoo askarta la siinayo xirfadaha aasaasiga ah ee militariga, qorsheynta hawlgallada iyo farsamooyinka dagaalka. Wararka ayaa sheegaya in tababarka ay bixinayaan macallimiin militari oo ka kala socda Romania, Ukraine, Koonfur Afrika iyo Colombia, inkastoo dowladda Soomaaliya aysan si rasmi ah uga hadlin qaabka loo soo xulay tababarayaashaas.
Barnaamijkan ayaa daba socda heshiis iskaashi oo dhinaca difaaca ah oo Soomaaliya iyo Sacuudi Carabiya ay ku kala saxiixdeen magaalada Riyadh 9-kii Febraayo 2026. Heshiiskaas ayaa diiradda saaraya tababarka ciidamada, iskaashiga amniga iyo xoojinta xiriirka militariga ee labada dal.
Dowladda Federaalka Soomaaliya ayaa sannadihii u dambeeyay ballaarisay iskaashiga dhinaca difaaca iyadoo heshiisyo la gashay dalal ay ka mid yihiin Turkiga, Mareykanka, Imaaraadka Carabta, Masar, Eritrea iyo Uganda. Dalalkan ayaa door ka qaadanaya tababarka iyo tayeynta cutubyo kala duwan oo ka tirsan ciidamada Soomaaliya.
Barnaamijka cusub ee Sacuudigu maalgelinayo ayaa kusoo beegmaya xilli dowladda Federaalka ay waddo dadaallo lagu xoojinayo awoodda ciidamada si loo dardargeliyo howlgalada ka dhanka ah Al-Shabaab. Sidoo kale, falanqeeyayaal ayaa aaminsan in taageerada militari ee sii kordheysa ay qeyb ka tahay tartanka saameynta ee dalalka gobolka iyo quwadaha caalamka ay ka wadaan Soomaaliya, oo leh muhiimad istaraatiiji ah marka la eego amniga iyo marinada ganacsiga badda.
