Wararka24: Wasiiru-dowlaha Wasaaradda Arrimaha Dibadda iyo Iskaashiga Caalamiga ah ee Soomaaliya, Cali Balcad, ayaa maanta kulan rasmi ah la yeeshay Wasiirka Arrimaha Dibadda ee Mauritania, Maxamed Saalim Marzuuq, kaas oo ka dhacay xarunta Wasaaradda Arrimaha Dibadda ee dalkaas.
Kulanka waxaa goobjoog ka ahaa Danjiraha Soomaaliya u fadhiya Aljeeriya, ahna Danjiraha aan degganeyn ee Mauritania, Danjire Yuusuf Axmed Xasan (Yuusuf Jeego), iyo mas’uuliyiin kale oo ka kala socday labada dowladood.
Labada dhinac ayaa ka wada hadlay xoojinta xiriirka laba geesoodka ah, iskaashiga diblomaasiyadeed iyo sidii loo ballaarin lahaa wada-shaqeynta Soomaaliya iyo Mauritania ee dhinacyo kala duwan.
Intii uu socday kulanka, Soomaaliya iyo Mauritania ayaa kala saxiixday saddex heshiis is-afgarad (MoU), kuwaas oo lagu xoojinayo iskaashiga labada dal. Heshiisyada ayaa diiradda lagu saaray amniga, la dagaallanka argagixisada, kalluumeysiga, batroolka iyo waxbarashada.
Wasiiru-dowlaha Arrimaha Dibadda Soomaaliya, Cali Balcad, ayaa sheegay in booqashadiisu ay qayb ka tahay dadaallada dowladda Federaalka Soomaaliya ay ku ballaarinayso xiriirka ay la leedahay dalalka Afrika, gaar ahaan kuwa gobolka, si loo xoojiyo iskaashiga siyaasadeed, amniga iyo horumarinta dhaqaalaha.
Labada dowladood ayaa muujiyay sida ay uga go’an tahay hirgelinta heshiisyada la saxiixay, iyagoo sheegay inay muhiim u yihiin horumarinta xiriirka iyo iskaashiga u dhexeeya Soomaaliya iyo Mauritania, isla markaana ay gacan ka geysan doonaan kor u qaadista danaha wadajirka ah ee labada dal.
