Wararka24: Dowladda Federaalka Soomaaliya iyo Boqortooyada Sacuudi Carabiya ayaa ka wada hadlay xaaladda amni ee marin-biyoodka Baab Al-Mandab iyo Gacanka Cadmeed, kuwaas oo muhiim u ah isu-socodka maraakiibta ganacsiga caalamiga ah.
Wadahadalkan ayaa yimid kaddib kulan dhinaca taleefanka ah oo dhex maray Wasiirka Arrimaha Dibadda Soomaaliya, Cabdisalaan Cabdi Cali Dhaay, iyo dhiggiisa Sacuudiga, Amiir Faisal bin Farhan Al Saud, iyadoo diiradda lagu saaray iskaashiga labada dal iyo arrimaha amniga gobolka.
War-saxaafadeed ay si wadajir ah u soo saareen labada dhinac ayaa lagu sheegay in Soomaaliya iyo Sacuudigu ay isku raaceen muhiimadda ay leedahay sugidda amniga biyaha caalamiga ah, gaar ahaan marin-biyoodka Baab Al-Mandab iyo Gacanka Cadmeed.
Labada dal ayaa sidoo kale adkeeyay baahida loo qabo in la xoojiyo dadaallada lagu ilaalinayo xorriyadda isu-socodka maraakiibta iyo in laga hortago khatar kasta oo saameyn karta ganacsiga iyo isu-socodka caalamiga ah.
Boqortooyada Sacuudi Carabiya ayaa mar kale xaqiijisay taageerada ay u hayso midnimada, madaxbannaanida, wadajirka dhuleed iyo gobannimada siyaasadeed ee Jamhuuriyadda Federaalka Soomaaliya.
Sacuudiga ayaa sidoo kale ku baaqay in la ixtiraamo shuruucda caalamiga ah iyo mabaadi’da lagu ilaalinayo xasilloonida gobolka, isagoo muujiyay sida ay uga go’an tahay sii wadidda iskaashiga kala dhexeeya Soomaaliya.
Kulankan ayaa ku soo beegmaya xilli ay sii kordhayaan walaacyada amni ee ka jira Badda Cas iyo Gacanka Cadmeed, kuwaas oo muhiimad weyn u leh ganacsiga iyo isku socodka caalamiga ah.
