Dowladda Sacuudiga ayaa billowday dadaallo lagu xoojinayo xiriirka ay la leedahay Burkina Faso, xilli dalkaasi uu dib u habeyn ku sameynayo xiriirradiisa diblomaasiyadeed kaddib hoos u dhaca xiriirka uu la lahaa Faransiiska.
Sacuudiga ayaa magacaabay Saad Misfer inuu noqdo safiirka u qaabilsan Burkina Faso, iyadoo loo xilsaaray xoojinta iskaashiga siyaasadeed, dhaqaale iyo horumarineed ee labada dal.
Mas’uuliyiin ka tirsan dowladda Burkina Faso ayaa sheegay in Sacuudigu qorsheynayo hirgelinta mashaariic horumarineed oo laga fulinayo magaalooyin kala duwan oo dalkaasi ku yaalla.
Tallaabadan ayaa ku soo beegmaysa xilli dowladda uu hoggaamiyo Madaxweyne Ibrahim Traoré ay hore u qaaday tallaabooyin lagu dhimayo saameynta Faransiiska, kadib markii ay dalka ka saartay diblumaasiyiin Faransiis ah oo lagu eedeeyay faragelin arrimaha gudaha.
Sacuudiga ayaa sii wada qorshihiisa horumarineed ee ku xusan Himilada 2030, iyadoo Afrika ay ka mid tahay gobollada ay Riyadh dooneyso inay ku ballaariso iskaashigeeda dhaqaale iyo maalgashi.
Burkina Faso ayaa ka mid ah waddamada hodanka ku ah kheyraadka dabiiciga ah, gaar ahaan dahabka, taas oo ka dhigaysa meel muhiim u ah maalgashiga iyo iskaashiga istiraatiijiga ah ee gobolka Galbeedka Afrika.
