Wararka24: Dowladda Qatar ayaa ku dhawaaqday in aysan ka qayb qaadan doonin dhexdhexaadinta u dhexeysa Mareykanka iyo Iiraan, iyadoo arrintan si rasmi ah looga shaaciyay shir jaraa’id oo ka dhacay magaalada Dooxa.
Afhayeen u hadlay Wasaaradda Arrimaha Dibadda Qatar ayaa sheegay in mudnaanta hadda ay tahay in la joojiyo weerarrada ka socda gobolka, halkii diiradda la saari lahaa wada hadallo cusub.
Qatar oo hore uga mid ahayd dhexdhexaadiyeyaasha ugu muhiimsan ee xiriirka Mareykanka iyo Iiraan ayaa hadda muujisay isbeddel ku yimid doorkeedii diblomaasiyadeed.
Mas’uuliyiinta Doha ayaa sidoo kale sheegay in ay sii wadi doonaan xiriirka ay la leeyihiin Iiraan, isla markaana aysan ka go’i karin xaaladda gobolka.
Dhanka kale, Qatar ayaa sheegtay in ay weli la shaqeyneyso Mareykanka si loo helo xal diblomaasiyadeed oo lagu yareeyo xiisadda ka taagan Bariga Dhexe.
Wararka ayaa tilmaamaya in dalal kale sida Masar, Pakistan iyo Turkiga ay haatan isku dayayaan inay qaataan door dhexdhexaadin ah si loo dejiyo xaaladda.
Sidoo kale, waxaa la filayaa in kulamo dhexdhexaadin ah lagu qabto Pakistan, halkaas oo saraakiil Mareykan ah ay la kulmi karaan wakiillo ka socda Iiraan.
Go’aankan cusub ee Qatar ayaa muujinaya isbeddel ku yimid siyaasadda gobolka, iyadoo dadaallada lagu doonayo in lagu gaaro heshiis ay weli socdaan.
