Wargeyska Washington Post ayaa maanta daabacay maqaal muhiim ah oo ku saabsan siyaasadda cusub ee maamulka Trump uu ku wajahan yahay Soomaaliya iyo saamaynta ay ku yeelan karto amniga gobolka.
Guddiga tifaftirka wargeyska ayaa qoray in Mareykanka mar kale uu u muuqdo inuu marayo marxalad dayac cusub xagga Soomaaliya, taasoo khatar gelin karta danaha Mareykanka iyo xasilloonida Geeska Afrika.
Xukuumadda Trump ayaa hadda ku hawlan dib u habeyn ballaaran oo ku saabsan siyaasadda Mareykanka ee Afrika. Qorshuhu wuxuu ku jiraa jarista gargaarka dibadda iyo hoos u dhigida tababarka la siiyo ciidamada maxalliga ah ee la dagaalamaya kooxaha argagixisada.
Wargeysadku wuxuu tilmaamay in General Michael Langley oo ah taliyaha AFRICOM uu sheegay “Waxaan diiradda saaraynaa in aan somaliya siino awood halkii laga abuuri lahaa ku-tiirsanaan.”
Wasiirka Difaaca Pete Hegseth ayaa qorsheynaya in dhaqaalaha dib loogu wareejin doono arrimaha Trump mudnaanta siinayo sida hawlgallada xadka koonfureed iyo casriyeynta hubka nukliyeerka. AFRICOM aysan jirin mudnaan gaar ah oo ku jirta qorshahan.
Wargeysku wuxuu sheegay in sanadkan Mareykanka uu jaray taageeradii uu siiyay ciidanka gaarka ah ee Danab. Taageeradaasi waxay ahayd $1.5 bilyan oo doollar sanadkii, taasoo hadda la joojiyay.
Ciidanka Danab ayaa ahaa kuwa ugu waxtar badan ee dowladda Soomaaliya ku wajahdo Al-Shabaab. Dowladda Soomaaliya oo ay haysato dhaqaale xumo ayaa hada wajahaysa u adkaanaysiga bixinta mushaarka Danab.
Washington Post wuxuu xusay in ka bixitaanka Mareykanka uu imanayo xilli Al-Shabaab ay qaadayso weeraro joogto ah. Saddexdii bilood ee la soo dhaafay, kooxdu waxay la wareegeen magaalooyin muhiim ah.
“Al-Shabaab waxay hadda ka hawlgalaan ku dhowaad saddex meelood meel dalka,” ayuu qoray wargeysku. Hay’adda ACLED ayaa sheegtay in kooxdu ay bilaabatay weeraradooda bishii February si ay uga faa’iideystaan meel bannaan.
Wargeysku wuxuu xusuusiyay weerarkii 2020 ka dhacay saldhig Mareykan ah oo ku yaalay Kenya kaasoo lagu dilay saddex Mareykan ah. “Kooxdaasi xitaa waxay qorsheeyeen weerar la mid ah kii 9/11,” ayuu ku daray maqaalku.
Wargeyska ayaa caddeeyay in dad badan oo Mareykan ah ay u arkaan Soomaaliya meel fog, laakiin runtu tahay in dalku ku yaallo meel istiraatiiji ah oo muhiim u ah Badweynta Hindiya iyo Gacanka Cadmeed.
“Burcad-badeednimadii Soomaalida ee billowgii 2000-meeyadii waxay carqaladeysay maraakiibtii ganacsiga caalamiga ah,” ayuu qoray Washington Post.
Maqaalku wuxuu dib u eegay taariikhda xiriirka Mareykanka iyo Soomaaliya tan iyo 1980-kii. Wuxuu xusay taageeradii Mareykanka ee Siyaad Barre ilaa 1991 iyo sida xiriirku u hakad galay ka dib burburkii Midowgii Soofiyeeti.
Washington Post wuxuu tilmaamay dagaalkii 1993 ee Muqdisho oo lagu riday laba diyaaradood oo Black Hawk ah iyo sida Mareykanka dib ugu soo laabtay ka dib weeraradii 9/11.
