Maamulka Puntland ayaa si rasmi ah ugu dhawaaqay inuu dib ugu soo laabanayo ka qeybgalka wadahadallada iyo shirarka dowladda federaalka Soomaaliya, tallaabo loo arko mid horseedi karta is-afgarad siyaasadeed oo lagu xallinayo khilaafaadkii taagnaa.
Go’aankan cusub ayaa yimid kadib dadaallo diblomaasiyadeed iyo kulamo gaar gaar ah oo u dhexeeyay madaxda dowladda federaalka iyo kuwa Maamulka Garowe, kuwaas oo diiradda saaray sidii loo dhisi lahaa kalsooni cusub oo u dhaxeysa dhinacyada.
Maamulka ayaa muddo ka maqneyd fadhiyada iyo shirarka heer federaal ah, iyadoo ka cabaneysay arrimo ay ka mid yihiin nidaamka doorashooyinka, dastuurka qabyada ah iyo awood qeybsiga. Maamulka Garoowe ayaa marar badan ku celceliyay in la’aan heshiis dhab ah aysan ka qeyb geli doonin shirar u dhexeeya dowladda dhexe iyo dowlad goboleedyada.
Balse war kasoo baxay xafiiska madaxweynaha Puntland ayaa lagu sheegay in maamulka diyaar u yahay inuu si buuxda uga qeyb qaato dhammaan hannaanada siyaasadeed ee muhiimka u ah mustaqbalka dalka, gaar ahaan dhismaha hay’adaha dastuuriga ah iyo doorashooyin loo dhan yahay.
Tallaabadan ayaa si weyn loogu soo dhaweeyay gudaha dalka, iyadoo loo arko mid horseedi karta wadashaqeyn cusub oo u dhaxeysa dowladda dhexe iyo maamul goboleedyada, taasoo lama huraan u ah xasiloonida iyo horumarka Soomaaliya.
