Hay’adda Sirdoonka iyo Nabadsugidda Qaranka (NISA) ayaa sheegtay inay laba howlgal oo ka dhacay degmada Moqokori ee gobolka Hiiraan ku dishay laba xubnood oo ka tirsan kooxda Al-Shabaab, kuna dhaawacday saddex kale.
NISA ayaa sheegtay in howlgallada ay fuliyeen ciidamadeeda oo kaashanaya saaxiibada caalamka, inkastoo aysan magacaabin dalalka ay ka midka yihiin.
Howlgalka koowaad ayaa dhacay 10-ka Noofembar, wuxuuna ka dhacay inta u dhaxeysa tuulooyinka Kheyraanle iyo Butaale, oo ku yaalla duleedka degmada Moqokori.
Sida ay sheegtay NISA, howlgalkaas waxaa lagu dilay laba xubnood. Mid ka mid ah ayaa lagu magacaabaa Ismaaciil, oo hay’addu ku tilmaantay masuulka maaliyadda ee kooxda ee deegaanka Aboorey.
Midka kale ayaa ahaa Makaraan, oo la sheegay inuu darawal u ahaa taliyaha kooxda ee degmada Maxaas.
Howlgalkaas waxaa sidoo kale lagu dhaawacay Cabdiraxmaan Cosobow, oo NISA ku tilmaantay taliyaha kooxda ee degmada Maxaas.
Ciidamada ayaa sidoo kale burburiyay gaari nooca NOAH ah iyo 50 xabbadood oo rasaas ah.
Howlgalka labaad ayaa dhacay 16-ka Noofembar, waxaana lala beegsaday guri ku yaallay degmada Moqokori, kadib markii la xaqiijiyay in ay ku sugan yihiin xubno ka tirsan kooxda.
Howlgalkaas waxaa lagu dhaawacay laba xubnood, oo kala ah Bilaal, oo ka tirsanaa qeybta sahayda, iyo Mahad, oo NISA ku tilmaantay inuu ka tirsanaa qeybta qorsheynta weerarrada.
Ilaa hadda lama hayo war ka soo baxay Al-Shabaab oo ku saabsan howlgallada, mana jirto xaqiijin madax bannaan oo ku saabsan tirada NISA sheegtay.
Hay’adda ayaa ballanqaadday inay sii wadi doonto howlgallada lagu beegsanayo hoggaamiyeyaasha iyo maleeshiyaadka kooxda.
Al-Shabaab ayaa sannadkii 2025 dib ula wareegtay degmooyinka Moqokori, Maxaas iyo Aboorey, kuwaas oo ciidamada dowladda iyo maleeshiyaadka deegaanku kala wareegeen sannadkii 2022.
Gobolka Hiiraan ayaa muddooyinkan dambe ka dhacayay dagaallo joogto ah oo u dhexeeya ciidamada dowladda iyo Al-Shabaab.









