MUQDISHO – Madaxweynaha Soomaaliya Xasan Sheekh Maxamuud ayaa shaqada ka tiray Lataliyihiisa Amniga Qaranka Xuseen Macallin, isagoo xilkaasi si ku-meel-gaar ah ugu wareejiyey Danjire Aweys Shiikh Yuusuf, sida ay warar hoose sheegayaan.
Tallaabadan ayaa timid kadib markii markab lagu magacaabo Sea World, oo la sheegay inuu hub ka keenay dalalka Azerbaijan, Turkiga, iyo Masar, uu gacanta u galay ciidamada badda Puntland xilli uu ku sugnaa xeebta Bareeda ee gobolka Raas Caseyr.
Markabkan, oo aan lahayn wax cilad ah, ayaa la sheegay inuu laba maalmood taagnaa aagga xeebtaas kahor inta aan la qaban, waxaana hadda lagu hayaa Dekedda Boosaaso, halkaas oo ay ka socdaan baaritaanno ku saabsan hubka saaran iyo halka uu ku socday.
Wararka ayaa sheegaya in Xuseen Macallin uu lahaa masuuliyadda markabkan, iyadoo illaa hadda aan si rasmi ah loo caddeyn cidda dalbatay ama leh hubka. Waxaana hada ka socda puntland baaritaan ku saabsan tirada hubka iyo meesha uu kusocday, iyo cida dalbatay.
Xogta aan la xaqiijin ayaa tilmaamaysa in arrintan ay sababtay in Madaxweyne Xasan Sheekh go’aansado in xilka laga qaado Xuseen Macallin oo loo arko inuu si toos ah ama dadban ugu lug lahaa arinta hubka.
Aweys Shiikh Yuusuf ayaa hadda si ku-meel-gaar ah loogu dhiibay la-taliyaha cusub ee madaxweynaha arimaha Amniga Qaranka.
