Wararka24: 3-02-2026 Markab kalluumeysi oo laga leeyahay Shiinaha, isla markaana ay qabsadeen rag hubeysan meel ka baxsan xeebaha Puntland, ayaa la sii daayay 2-da Maarso, iyadoo ay la socdeen dhammaan shaqaalaheedii.
Sii deyntan ayaa timid kaddib dadaallo wadajir ah oo ay sameeyeen dowladda Shiinaha, Dowladda Federaalka Soomaaliya iyo maamulka Puntland, sida ay sheegeen mas’uuliyiin.
Safaaradda Shiinaha ee Muqdisho ayaa Talaadadii xaqiijisay in markabka iyo shaqaalihiisii si nabad ah lagu soo celiyay, kaddib wada-tashiyo iyo iskaashi dhow oo dhex maray hoggaanka federaalka Soomaaliya iyo Madaxtooyada Puntland.
Safaaraddu waxay cambaareysay weerarka lagu qaaday markabka, iyadoo sheegtay in uu haystay oggolaansho rasmi ah oo uu kaga howlgalo biyaha Soomaaliya.
Dowladda Shiinaha ayaa sidoo kale ballanqaadday inay sii xoojin doonto tallaabooyinka lagu ilaalinayo badbaadada muwaadiniinteeda iyo maraakiibteeda ka howlgala gobolka, isla markaana ay sii adkeyn doonto iskaashiga dhinaca amniga ee ay la leedahay Soomaaliya.
Ilaa hadda lama shaacin in madax-furasho laga bixiyay sii deynta markabka. Horey waxaa loo sheegay in kooxihii qabsaday markabka ay dalbadeen lacago gaaraya malaayiin doollar, balse ma jiro war rasmi ah oo arrintaas ku saabsan.
Dhanka kale, warbixinno soo baxay sanadihii u dambeeyay ayaa muujinaya in qaar ka mid ah maraakiibta jiriifka ee Shiinaha lagu eedeeyay inay si sharci-darro ah uga kalluumeysadaan biyaha Soomaaliya, gaar ahaan xeebaha Puntland.
Eedeymahaas ayaa saameyn ku yeeshay kalluumeysatada maxalliga ah, kuwaas oo cabasho ka muujiyay hoos u dhaca kheyraadka badda.
