Muqdisho – Dowladda Maraykanka ayaa sheegtay masuuliyadda duqayn ka dhacday gudaha Soomaaliya oo lagu dilay Nabadoon Cumar Cabdullaahi Cabdi. Mas’uuliyiin Maraykan ah ayaa ku tilmaamay ninka la dilay inuu xiriir dhow la lahaa kooxda Al-Shabaab.
Duqayntan ayaa la sheegay inay dhacday 13-kii Sebtembar, iyadoo dowladda Maraykanku caddeysay in ay iyadu ka dambeysay howlgalkaas. War-saxaafadeed laga soo saaray ayaa lagu sheegay in weerarkaasi uu ahaa mid lagu bartilmaameedsaday xubno ay ku tuhmayeen Al-Shabaab.
Si kastaba ha ahaatee, ilaa iyo hadda ma jiraan ilo madax bannaan oo xaqiijiyay sheegashada Maraykanka ee ku saabsan doorka Nabadoonka lagu dilay inuu ka tirsanaa ama xiriir la lahaa Al-Shabaab.
Arrintan ayaa kusoo beegmaysa iyadoo Maraykanku uu horey uga fuliyay duqaymo badan gudaha Soomaaliya, kuwaas oo marar badan muran dhaliyay, laguna dhaliilay in ay sababeen khasaare shacab.
