Wararka24: Madaxweynaha Ukraine, Volodymyr Zelensky, ayaa soo jeediyay in uu kulan toos ah la yeesho Madaxweynaha Ruushka, Vladimir Putin, si xal loogu helo dagaalka muddada dheer socday ee u dhexeeya labada dal.
Warqad furan oo uu u diray Putin, Zelensky ayaa sheegay in nabad waarta lagu gaari karo oo keliya wada-hadal toos ah oo dhex mara hoggaamiyeyaasha Ukraine iyo Ruushka. Wuxuu sidoo kale ku baaqay in la hirgeliyo xabbad-joojin buuxda inta ay socdaan wada-hadallada.
Madaxweynaha Ukraine ayaa ku dooday in aan la sugi karin in dagaalka dib ugu soo laabto dhexdaxadinta Mareykanka, isagoo xusay in xal degdeg ah loo baahan yahay si loo yareeyo khasaaraha bani’aadamnimo ee dagaalka.
Dhanka kale, Rushka ayaa xaqiijiyay inay helay warqadda Zelensky, inkastoo Moscow ay mar kale ku celisay mowqifkeeda ah in Ukraine ay sameyso tanaasulaad siyaasadeed iyo mid dhuleed si heshiis loo gaaro.
Putin ayaa sheegay inuu diyaar u yahay wadahadal, balse wuxuu ku adkeystay in xal kasta uu ku xirnaan doono tanaasulaad laga sameeyo arrimaha muranka dhalinaya, oo ay ku jiraan gobollada ay Ruushku gacanta ku hayaan iyo qorshaha Ukraine ee ku biirista NATO.
Ukraine ayaa si cad u diidday inay ka tanaasusho dhulkeeda, iyadoo ku doodaysa in tallaabo noocaas ah ay dhiirrigelin karto duullaanno kale mustaqbalka.
Sidoo kale, Madaxweynaha Mareykanka, Donald Trump, ayaa taageeray fikradda kulanka labada hoggaamiye, isaga oo sheegay in ay fiicnaan lahayd haddii Zelensky iyo Putin ay si toos ah u kulmaan si loo dardargeliyo dadaallada nabadda.
Wadahadalladii hore ee lagu doonayay xabbad-joojin iyo heshiis nabadeed ayaa bilihii lasoo dhaafay ka dhacay meelo kala duwan, balse ma aysan soo saarin heshiis rasmi ah oo lagu soo afjaro colaadda.
Dagaalka Ukraine iyo Ruushka ayaa hadda galay sannadkii shanaad, iyadoo labada dhinac ay weli sii wadaan weerarrada militari iyo isku dayada diblomaasiyadeed ee lagu raadinayo xal siyaasadeed.
