Wararka24: Dowladda Mareykanka ayaa muujisay walaac xooggan oo ku saabsan rabshadaha iyo dagaallada ka socda magaalada Muqdisho, iyadoo ka digtay in xaaladda sii xumaaneysa ay khatar ku tahay amniga, xasilloonida iyo mustaqbalka Soomaaliya.
Bayaan kasoo baxay Safaaradda Mareykanka ee Soomaaliya ayaa lagu sheegay in rabshadaha iyo iska horimaadyada hubeysan ee ka socda caasimadda ay yihiin kuwo laga walaacsan yahay, islamarkaana loo baahan yahay in si degdeg ah loo yareeyo xiisadda taagan. Safaaraddu waxay ugu baaqday dhammaan dhinacyada siyaasadda iyo amniga inay muujiyaan masuuliyad iyo is-xakameyn.
“Madaxda Soomaaliyeed ee dhammaan dhinacyada waxay leeyihiin waajibaad ay ku ilaaliyaan xasilloonida isla markaana ay ku xalliyaan kala duwanaanshahooda si nabad ah,” ayaa lagu yiri bayaanka safaaradda.
Mareykanka ayaa sidoo kale carrabka ku adkeeyay in tallaabooyinka la qaado saacadaha iyo maalmaha soo socda ay saameyn weyn ku yeelan karaan jihada siyaasadeed iyo amni ee dalka. Dowladda Mareykanka waxay sheegtay in xal kasta oo waara lagu gaari karo oo keliya wada-hadal, is-afgarad iyo hannaan nabadeed oo ay dhinacyadu ku xalliyaan khilaafaadkooda.
Digniintan ayaa kusoo aadeysa xilli magaalada Muqdisho ay ka jiraan dagaallo iyo xiisado amni oo sababay cabsi iyo walaac ballaaran. Wararka laga helayo caasimadda ayaa sheegaya in qaar kamid ah waddooyinka iyo goobaha ganacsiga ay saameyn ku yeesheen xaaladda amni, halka qoysas badan ay ka baqayaan in rabshaduhu sii xoogaystaan.
Beesha caalamka ayaa maalmihii la soo dhaafay kordhisay baaqyada ay u direyso dhinacyada Soomaalida, iyagoo ku boorrinaya inay ka fogaadaan gacan ka hadalka iyo tallaabo kasta oo horseedi karta xasillooni darro hor leh.
Waxaa weli la sugayaa tallaabooyinka ay qaadi doonaan madaxda iyo dhinacyada ku lugta leh khilaafka, iyadoo shacabka Soomaaliyeed ay rajeynayaan in la helo xal degdeg ah oo lagu soo celiyo amniga iyo deganaanshaha Muqdisho.
